A faaitoito i to oe apiti i roto i te taviniraa
1. E nafea ia pee i te hiˈoraa o te aposetolo Paulo a ohipa ai tatou e te tahi i roto i te taviniraa?
1 No te aposetolo Paulo, ua riro te pororaa e te mau hoa Kerisetiano ei taime tano no te faaitoito i te tahi e te tahi. (Roma 1:12) Ia ohipa oe e te tahi taata poro i roto i te taviniraa, e haafaufaa anei oe i tera taime no te faaitoito e tauturu ia ˈna? No te aha e ore ai e faaite atu eaha tei tauturu ia oe ia riro ei taata poro aravihi?
2. Ia aha tatou no te tauturu i to tatou hoa Kerisetiano ia ore e taiâ? No te aha e mea faufaa ia na reira?
2 A faaitoito atu: Te taiâ nei te tahi mau taata poro, e itehia te reira i nia i to ratou hohoˈa mata e i te toparaa reo. A faaitoito ïa ia ratou ma te haapopou atu. Eaha te tahi atu mau ravea e tauturu ia ratou ia ore e taiâ faahou? E faaite te hoê tiaau ratere i to ˈna apiti i to ˈna iho mǎtaˈu e e nafea te pure pinepine e tauturu ai ia ˈna. Teie atoa ta te tahi atu taeae i parau: “Na mua roa, a faaite i te mata ataata. I te tahi taime, e ere i te mea ohie ia faaite noa i te reira. Mea titauhia ïa ia pure.” E ravea anei tei tauturu ia oe ia ore e taiâ faahou i roto i te taviniraa? A tauaparau i nia i te reira e to oe apiti.
3. Eaha te faaite i to tatou apiti ia aravihi atu â oia i roto i te taviniraa?
3 A haapii atu: E omuaraa aore ra uiraa maitai anei ta oe no te haamata i te tauaparauraa? E nehenehe anei oe e faahiti i te hoê ohipa i tupu i ô tatou? Ua ite anei oe i te mau faahopearaa maitai a faatano ai oe i te hoê hohoˈa faaiteraa? A faaite ïa i to oe apiti. (Mas. 27:17) A haere ai oe e farerei i te taata, a parau i to oe apiti eaha ta oe i opua e rave. I muri iho i te tahi haapiiraa Bibilia, e nehenehe oe e faataa no te aha oe i maiti ai i te tahi manaˈo, irava aore ra ravea haapiiraa no te tauturu i te piahi.
4. No te aha e mea tia ia anaanatae i te tauturu i to tatou mau hoa Kerisetiano?
4 I te senekele matamua, aita te taata poro i anaanatae noa i te tauturu i te feia e ere i te Kerisetiano. Ua ite atoa ratou i te faufaaraa ia faaitoito i te tahi e te tahi. (Ohi. 11:23; 15:32) Ua faaineine te aposetolo Paulo ia Timoteo e ua faaitoito-atoa-hia oia ia faaite ia vetahi ê i ta te aposetolo i haapii ia ˈna. (Tim. 2, 2:2) E oaoa e e aravihi atu â to tatou mau hoa Kerisetiano ia hamani maitai tatou ia ratou i roto i te taviniraa. Hau atu â, e oaoa to tatou Metua i te raˈi.—Heb. 13:15, 16.