A tauturu i te taata ia faaroo i te Atua
1. Eaha na buka rairai e piti i matara mai i te tairururaa “Ia tae mai to te Atua Basileia!,” e no te aha mea ohie ai ia faaohipa?
1 I te tairururaa mataeinaa “Ia tae mai to te Atua Basileia!,” ua matara mai e piti buka rairai, Faaroo i te Atua no te ora e a muri noa ˈtu e te hoê neneiraa faaohiehia, Faaroo i te Atua. No te iti hoi o te mau parau papaihia, e nehenehe e huri oioi noa i teie nau buka rairai. No reira, ua fariihia e ia hurihia te buka rairai Faaroo i te Atua no te ora e a muri noa ˈtu na roto e 431 reo.
2. O vai te faufaahia i teie nau buka rairai?
2 O vai iho â râ te faufaahia i teie nau buka rairai? A hiˈo na i te mau tupuraa i muri nei o te ite-pinepine-hia ra na te ao nei:
• Te aparau ra te taata poro i te hoê fatu fare. I te farereiraa matamua aore ra i te farerei-faahou-raa, te taa ra ia ˈna e aita oia i ite aore ra te fifi ra oia i te taio.
• Te faaite ra te taata poro i te poroi i te hoê taata o te paraparau ra i te tahi reo aita roa ˈtu ta tatou mau papai i hurihia aore ra te tahi noa tei hurihia. Aore ra te poro ra oia i te vahi aita te rahiraa o te taata i ite i te taio i te reo ta ratou e paraparau ra.
• Te faaite ra te taata poro i te poroi na roto i te reo aparaa rima i te hoê tariˈa turi.
• Te hinaaro ra te hoê papa aore ra mama e haapii i te parau mau i ta ˈna tamarii aita i ite atura i te taio.
3. Mea nafea te buka rairai Faaroo i te Atua i te faaineineraahia?
3 Mea nafea teie nau papai i te faaineineraahia? Mea iti roa te papai i roto i te buka rairai Faaroo i te Atua, e pinepine hoê noa pereota e irava Bibilia i raro i te api taitahi o te haamahitihiti ra i te mau manaˈo faufaa. No te aha? A feruri na, e pûpû mai te hoê taata i te tahi buka rairai na roto i te hoê reo eita oe e nehenehe e taio, no te huru papairaa iho â râ. E anaanatae anei oe noa ˈtu e e hohoˈa nehenehe to roto? Eita roa ˈtu. E taiâ hanoa atoa te taata aita i ite i te taio ua rahi anaˈe te papai. No reira, ua faaineine e ua faarahi-maitai-hia te mau hohoˈa. Na te hoê tapao e faaite eaha te hohoˈa e tauaparauhia i muri iho.
4. Mea nafea te buka rairai Faaroo i te Atua no te ora e a muri noa ˈtu i te faaineineraahia?
4 Hoê â hohoˈa to roto i teie na buka rairai. Ua faaineinehia te papai Faaroo i te Atua no te ora e a muri noa ˈtu no te feia e fifi ra aore ra e haapii ra i te taio. E nehenehe atoa te reira e faaohipahia e te piahi e haapii ra i te buka rairai Faaroo i te Atua. E pahono na api e piti i te uiraa i nia i te pae aui. Taa ê atu i te mau hohoˈa, te vai atoa ra te mau faataaraa e te mau irava Bibilia. I te hiti i raro i te tahi mau api, te vai ra te tahi mau manaˈo hau e irava Bibilia e nehenehe e tauaparauhia ia au i te tupuraa o te piahi.
5. Afea e nafea e pûpû ai i teie nau buka rairai?
5 E nafea ia pûpû atu? E pûpû paha oe i teie nau buka rairai a poro ai oe i tera e tera fare e i te mau taime atoa e manaˈo ai oe e mea faufaa ia na reira, noa ˈtu e e ere i te pûpûraa o te avaˈe. (A hiˈo i te tumu parau tarenihia “E nafea ia pûpû atu?”) A na reira atoa ia hoˈi oe e farerei i te taata i anaanatae mai ma te parau e e hinaaro oe e faaite ia ˈna i te tahi mea e i muri iho a horoa ˈtu i te hoê buka rairai.
6. E nafea ia faatere i te hoê haapiiraa Bibilia e teie nau buka rairai?
6 I roto i te buka rairai Faaroo i te Atua aita e uiraa, eita ïa te haapiiraa e faaterehia ma te mau uiraa e pahonoraa mai tei ravehia nei e te buka Bibilia haapii. Mea au na te taata atoa te mau aamu. No reira, a faaohipa i te mau hohoˈa no te faatia i te mau aamu Bibilia. A faataa i te hohoˈa ma te anaanatae. A ani i te manaˈo o te piahi. A taio i te mau irava i raro i te api, e a haaferuri ia ˈna i tei parauhia. A horoa ˈtu i te uiraa ia apiti oia i te aparauraa e ia papu ia oe e ua taa maitai oia. Mai te peu e te faaohipa ra oia i te buka rairai Faaroo i te Atua no te ora e a muri noa ˈtu, a taio i te faataaraa e te mau irava e tano maitai ra a paraparau ai orua i nia i te hohoˈa taitahi.
7. E nafea e tauturu ai i te piahi ia haere i mua?
7 A tauturu i te piahi ia haere i mua: A tiaturi e e faaara ta oe mau parau i to ˈna hinaaro e haapii i te taio a noaa atu ai ia ˈna te ite ia Iehova. (Mat. 5:3; Ioa. 17:3) No reira, tei nia anaˈe te aparauraa i te buka rairai Faaroo i te Atua, ia taimehia, e faaite paha oe ia ˈna e nafea ia taio a taui atu ai te haapiiraa i nia i te buka rairai Faaroo i te Atua no te ora e a muri noa ˈtu. Eitâ paha te piahi e ineine no te bapetizoraa ia hope teie buka rairai. Mea titauhia ïa ia haapii ia ˈna i te buka Bibilia haapii aore ra te tahi atu papai e tano o te tauturu ia ˈna ia maramarama maitai atu â i te Bibilia.
8. No te aha tatou e mauruuru ai no teie nau papai apî no te pororaa?
8 Ia faaroo iho â te taata i te Arii o te ao taatoa e ora ˈi ratou e a muri noa ˈtu. (Isa. 55:3) Te hinaaro ra Iehova ia haapii “te taata atoa” i te faaroo ia ˈna, oia atoa te feia tei ore i ite i te taio. (Tim. 1, 2:3, 4) Auê tatou i te mauruuru i teie nau papai apî no te haapii i te taata ia faaroo i te Atua!
[Tumu parau tarenihia i te api 3]
E nafea ia pûpû atu?
A faaite i te mau api 2-3, e a parau atu: “E hinaaro anei oe e ora i roto i te hoê ao mai teie? [A vaiiho ia ˈna ia pahono.] Te fafau ra te Bibilia [aore ra, te fafau ra teie buka moˈa] e ua fatata roa te Atua i te faariro i teie ao ei vahi nehenehe e te hau aore roa e taata veve aore ra maˈi i reira. A tapao na eaha te titauhia ia rave no te ora i reira. [A taio i te Isaia 55:3, i te api 3.] Te faaue maira te irava, a ‘haere mai’ i te Atua e a ‘faaroo’ ia ˈna. E nafea râ tatou e faaroo ai i te Atua?” A huri i te mau api 4-5 e a aparau i nia i te pahonoraa. Aita anaˈe to ˈna e taime, a vaiiho atu i te buka rairai e a faataa i te mahana no te hoˈi atu e pahono i te uiraa.