Ta tatou fa matamua roa
1. Mea nafea to Iesu faaiteraa e mea faufaa roa te taviniraa no ˈna?
1 Ta Iesu fa matamua roa, o te taviniraa ïa. Ua haa uˈana oia, e ua na raro i te haere tau hanere kilometera e ati aˈe ia Paretetina no te poro i te taata e rave rahi roa. Ua faaohie noa oia i to ˈna oraraa no te horoa i te taime rahi no te taviniraa e no te tapi noa i te reira. (Mat. 8:20) I to te nahoa taata tamataraa i te tapea ia ˈna no te faaora i to ratou maˈi, ua parau atu oia: “E parau haere â vau i te parau maitai o te basileia o te Atua i te mau oire ê atu â e tia ˈi, i tonohia mai ai hoi au.”—Luka 4:43.
2. No te aha e mea faufaa roa ˈi te taviniraa no Iesu?
2 No te aha e mea faufaa roa ˈi te taviniraa no Iesu? Ta ˈna tapiraa matamua roa, o te faaraaraa ïa i te iˈoa o Iehova. (Mat. 6:9) Mea here na ˈna to ˈna Metua i te raˈi e ua hinaaro oia e faatupu i to ˈNa hinaaro e e auraro i ta ˈNa mau faaueraa atoa. (Ioa. 14:31) Hau atu â, ua anaanatae mau oia i te taata e ua hinaaro e tauturu ia ratou.—Mat. 9:36, 37.
3. E nafea ia faaite e o te taviniraa ta tatou fa matamua roa?
3 A pee ia Iesu: E mea fifi ia tapea i te hoê â fa matamua roa e ta Iesu i te mea e te titau rahi mai ra te ao i to tatou taime e te pûpû nei e rave rahi faaanaanataeraa. (Mat. 24:37-39; Luka 21:34) Ia papu ïa ia tatou eaha te mea faufaa aˈe ma te faataa i te taime no te faaineine ia tatou e no te apiti tamau i te pororaa. (Phil. 1:10) E tutava tatou i te faaohie noa i to tatou oraraa e eiaha ia rave roa i to teie nei ao.—Kor. 1, 7:31.
4. No te aha e mea faufaa roa ˈi ia riro noa te taviniraa ei fa matamua roa i teie nei?
4 Ia poto te taime, e rave na mua te hoê taata feruriraa paari i te mea faufaa aˈe. Ei hiˈoraa, ia ite oia e te piri maira te hoê vero puai rahi, to ˈna taime e to ˈna puai, no te parururaa ïa i to ˈna utuafare e te faaararaa i to ˈna mau taata tapiri. E nehenehe te tahi atu mau ohipa e tiai. Te fatata roa maira te vero puai rahi o Aramagedo. (Zeph. 1:14-16; Kor. 1, 7:29) No te faaora ia tatou e te feia e faaroo maira, ia ara ïa tatou ia tatou iho e i ta tatou haapiiraa i te mau taime atoa. (Tim. 1, 4:16) Oia, tei to tatou tapea-noa-raa i te taviniraa ei fa matamua roa e ora ˈi tatou!