Pahonoraa i ta outou mau uiraa

◼ E tano anei ia popou i muri iho i te vauvauraa taitahi o te Haapiiraa o te taviniraa teotaratia e o te Putuputuraa no te taviniraa?

I to te Atua Poiete ra o Iehova haamauraa i te tumu o te fenua nei, ‘ua fatu te mau fetia poipoi i te himene, e ua pii noa te mau tamarii atoa a te Atua i te oaoa.’ (Ioba 38:7) Ua hinaaro teie mau tamaiti melahi a te Atua e arue ia Iehova no ta ˈna ohipa faahiahia o te poieteraa, te hoê faaiteraa apî i to ˈna paari, maitai, e mana.

E mea maitai roa ia faaite tatou i te mauruuru haavare ore no te mau tutavaraa a to tatou mau taeae e no ta ratou vauvauraa. Ei hiˈoraa, e popou iho â tatou i muri iho i te mau oreroraa parau e te mau faaiteraa i te mau rururaa taa ê, mai te mau tairururaa. Ua titauhia te taime e te tutavaraa hau no te faaineine i te mau tuhaa i vauvauhia. E faaite to tatou popouraa i te mauruuru eiaha noa no te ohipa rahi a te taeae orero, no te haapiiraa atoa râ ta Iehova e horoa ra na roto i ta ˈna Parau e ta ˈna faanahonahoraa.—Isa. 48:17; Mat. 24:45-47.

Eaha ïa no te popouraa i muri iho i te mau vauvauraa i te Haapiiraa o te taviniraa teotaratia e te Putuputuraa no te taviniraa? Aita e faatureraa o te opani nei i te popou mai te peu e e ravehia te reira ma te aau tae, mai i muri iho i te tumu parau matamua a te hoê piahi. E nehenehe râ te popouraa e riro ohie ei mea faatia ture noa, a moe atu ai to ˈna auraa. No reira, ua matau tatou i te ore e popou i muri iho i te vauvauraa taitahi.

Noa ˈtu e eita tatou e popou i muri iho i te rahiraa o te mau vauvauraa o te Haapiiraa o te taviniraa teotaratia e te Putuputuraa no te taviniraa, te vai ra ˈtu â te mau ravea e nehenehe ai tatou paatoa e faaite i te mauruuru no te haapiiraa e no te mau tutavaraa a te feia e na mua mai. E nehenehe tatou e na reira ma te vai ara noa e te faaroo maite i te mau taeae orero. E i muri aˈe i te putuputuraa, e mea pinepine e e nehenehe tatou e faaite tia ˈtu i to tatou mauruuru no ta ratou mau tutavaraa.—Eph. 1:15, 16.