Ua horoahia mai te hoê taoˈa
1 Ua haafaufaa te aposetolo Paulo i ta ˈna ohipa faauehia e te Atua e poro e ua faaau i te reira i te hoê “taoˈa.” (Kor. 2, 4:7) Ua faaoromai oia i te mau fifi e hamani-ino-raa i to ˈna haapaoraa i ta ˈna ohipa. Ua poro oia ma te rohirohi ore i te feia atoa ta ˈna i farerei. Ua rave oia i te mau tere fifi roa e te atâta na nia i te fenua e na te moana. E nafea tatou e pee ai ia Paulo e e faaite ai e mea au na tatou i ta tatou taviniraa? (Roma 11:13) Na te aha e faariro i ta tatou taviniraa ei taoˈa faito ore?
2 Te hoê taoˈa hau ê: E pinepine te mau taoˈa i nia i te fenua i te faainoino roa e i te hopoi mai i te mau haamaitairaa taotiahia aore ra poto. I te tahi atu pae, e hopoi mai ta tatou taviniraa i te mau haamaitairaa mure ore na tatou e na te tahi atu. (Tim. 1, 4:16) E tauturu te reira i te mau taata aau haavare ore ia ite ia Iehova, ia rave i te mau tauiraa hinaarohia i roto i to ratou oraraa, e ia noaa te hoê tiaturiraa mau o te ora mure ore. (Roma 10:13-15) Ma te haafaufaa roa i ta tatou taviniraa, e noaa ia tatou te hoê tumu oaoa i roto i te oraraa, te huru aau papu e rave i te hoê ohipa faufaa, e te hoê tiaturiraa oaoa no te tau no a muri aˈe.—Kor. 1, 15:58.
3 A faaite e te haafaufaa ra oe i ta oe taoˈa: E pinepine na te ohipa ta tatou e rave no te hoê mea e faaite i te faufaaraa ta tatou e horoa ra i te reira. Auê ïa fanaˈoraa taa ê te faaohiparaa i to tatou taime e itoito no te arue ia Iehova! (Eph. 5:16, 17) E mea tia ia faaite te huru e faaohipa ˈi tatou i to tatou taime e te haafaufaa roa ra tatou i te mau mea pae varua eiaha râ te mau mea materia. I te mea e te vai ra ia tatou te tahi mea faufaa roa e tufa ˈtu, e hinaaro tatou e poro ma te anaanatae e e ara i te faaite i te parau apî maitai i te mau taime maitai atoa.
4 E pinepine eita te mau taoˈa moni roa e hunahia e faaiteitehia râ ia mataitaihia ˈtu. Ia hiˈo tatou i ta tatou taviniraa mai te hoê taoˈa, e riro te reira ei tuhaa faufaa roa o to tatou oraraa. (Mat. 5:14-16) Ia î roa to tatou aau i te mauruuru, ia tamau ïa tatou i te pee i te aposetolo Paulo e ia rave i te mau ravea atoa no te faaite e te haafaufaa mau ra tatou i ta tatou taviniraa, ma te faariro i te reira ei taoˈa.