Te here—te taviri o te hoê taviniraa hotu
1 “E haere mai outou ia ˈu nei, . . . e na ˈu outou e [tamahanahana].” (Mat. 11:28; MN) Ua faaite teie mau parau maitatai rahi a Iesu i te hohonu mau o to ˈna here i te taata. Ei tavini Kerisetiano, te hinaaro nei tatou e pee ia Iesu i roto i te faaiteraa i to tatou here i te mau taata ta teie ao here ore i faarohirohi roa. E nafea tatou e faaite ai i te here i te taata i roto i ta tatou ohipa pororaa?
2 Na roto i te parau: Turaihia e to ˈna here i te taata, ua haafaufaa Iesu i te mau taime atoa no te faaite i te parau apî maitai. (Ioa. 4:7-14) E tauturu te here ia tatou ia haavî i te taiâ e poro ma te faanaho-ore-hia. Ua horoa te hoê potii e ono matahiti i te faaiteraa maitai roa i te hoê vahine e tiai ra i pihai iho ia ˈna i te taote. Eaha tei turai ia ˈna ia na reira? Te faataa ra o ˈna e, “Ia hiˈohia, e au ra e mea tia ia ite teie vahine no nia ia Iehova.”
3 E nehenehe tatou e faaite i to tatou anaanatae i te taata ma te mata ataata mahanahana e te haavare ore e te toparaa reo auhoa. E faaiteraa atoa i te here te faaroo-maitai-raa i ta vetahi ê mau pahonoraa, te fariiraa i to ratou mau tapitapi e te faaite-roa-raa ˈtu i te anaanatae mau. (Mas. 15:23) Mai ia Iesu, e mea tia ia haamahitihiti tatou i te poroi faaitoito o te Basileia e to Iehova aroha e aumihi i te taata.—Mat. 24:14; Luka 4:18.
4 Na roto i te ohipa: Ua haamâha oioi atu Iesu i te mau hinaaro pae tino o vetahi ê. (Mat. 15:32) E nehenehe atoa tatou e rave i te tahi mau ohipa hamani maitai i roto i te taviniraa. Ua ite te hoê tuahine i te hoê vahine e tutava ra i te taa i te hoê poroi niuniu faufaa. Ua tauturu atu to tatou tuahine na roto i te huriraa i te mau parau. Ua nehenehe teie ohiparaa î i te here e faatupu i te hoê tauaparauraa bibilia o tei tauturu i taua vahine ra ia farii i te haapii i te Bibilia. I roto i te hoê farerei-faahou-raa, ua ite te hoê taeae e ua riri te fatu fare, no te mea ua mau te hoê tofa teiaha i te opani ra. I muri aˈe i to ˈna tautururaa ma te auhoa, ua parahi oioi atura te taeae i nia i te tofa ta ˈna i tauturu i te turai, e ua haamata i te hoê haapiiraa bibilia e te taata o tei mauruuru.
5 A apiti ai tatou i roto i te taviniraa, te faaite ra tatou i to tatou here i te Atua e i te taata-tupu. (Mat. 22:36-40) Na roto i teie huru faaiteraa ma te parau e te ohipa, e nehenehe te feia haavare ore e taa e tei ia tatou ra te parau mau.