Mǎtaˈu ore, mea faaea hau râ
1 E rave rahi taata o ta tatou e poro atu o te faaite ra i te mau tiaturiraa haavare ore e mea taa ê roa i te parau mau bibilia. A poro ai tatou ma te mǎtaˈu ore e tia ˈi, e hinaaro atoa tatou ‘e parahi hau noa i roto i te taata atoa nei’ e e ape i te faariri faufaa ore. (Roma 12:18; Ohi. 4:29) E nafea tatou ia mǎtaˈu ore e ia faaea hau a faaite ai tatou i te poroi o te Basileia?
2 Ia tu te manaˈo: E ape te hoê taata hau i te mau mârôraa. Eita te patoiraa ma te faufaa ore i ta te fatu fare tiaturiraa puai e turai ia ˈna ia faaroo i ta tatou poroi. Ia parau oia i te hoê parau hape, peneiaˈe e nehenehe tatou e faaô ma te faatano i te parau i te hoê tuhaa e tu ai paha te manaˈo. Ma te haamahitihiti i ta tatou e ta ˈna e tiaturi ra, e nehenehe paha tatou e faaore i te mau huru manaˈo faatoaruaru e e haaputapû i to ˈna aau.
3 Mai te peu e e vaiiho tatou i te manaˈo tano ore o te hoê fatu fare, te ofati ra anei tatou aore ra te haafaufaa ore ra anei tatou i te parau mau? Aita. Ta tatou ohipa ei tavini Kerisetiano e ere ïa o te patoiraa i te mau manaˈo hape atoa ta tatou e farerei, o te pororaa râ i te parau apî maitai o te Basileia o te Atua. (Mat. 24:14) Eiaha e riri ia parauhia te hoê manaˈo hape, e nehenehe râ tatou e hiˈo i te reira mai te hoê ravea maitai no te haroaroa i te manaˈo o te taata.—Mas. 16:23.
4 A atuatu i te tura: Te vai ra te mau taime e mea titauhia ia mǎtaˈu ore e ia itoito tatou no te patoi i te mau haapiiraa hape. Ei taata hau râ, e ape tatou i te tâhitohito e i te faaohipa i te mau parau faaino no te faataa i te feia o te tiaturi ra e o te haapii ra i te mea hape. E nehenehe te hoê huru faateitei e faaatea ê i te mau taata, tera râ e matara te feruriraa o te feia e hinaaro ra i te parau mau na roto i te haafatataraa ˈtu ma te haehaa e te hamani maitai. E atuatu te faaiteraa i te faatura i te feia e faaroo maira e i ta ratou mau tiaturiraa i to ratou tura, a farii ohie atu â ˈi ratou i ta tatou poroi.
5 Ua haapao te aposetolo Paulo i te mau tiaturiraa a te feia ta ˈna i poro atu e ua imi i te faaite i te parau apî maitai ma te haaputapû i to ratou aau. (Ohi. 17:22-31) Ua ineine o ˈna i te faaau ia ˈna iho “i te mau mea atoa i te taata atoa nei,” ia ‘ora te tahi pae ia ˈna iho i taua mau ravea atoa nei.’ (Kor. 1, 9:22) E nehenehe tatou e na reira atoa ma te parahi hau a poro ai tatou i te parau apî maitai ma te mǎtaˈu ore.