Ta tatou taviniraa—te hoê ohipa aumihi
1 Ua hiˈo Iesu e ‘ua purara e ua faarue-taue-hia’ te nahoa rahi o te faaroo ra i ta ˈna poroi, “mai te mamoe tiai ore ra.” (Mat. 9:36) Ma te aupuru e te here, ua haapii oia ia ratou i ta Iehova mau ture aveia, ua tamahanahana, e ua haamâha ma te aumihi i to ratou mau hinaaro i te pae varua. A feruriruri ai tatou i to ˈna mau haerea, te haapii ra tatou i te feruri e i te manaˈo mai ia Iesu, e e ite-papu-hia taua huru aumihi ra i roto i ta tatou taviniraa.
2 E rave anaˈe maa taime iti noa no te feruri mea nafea to Iesu haaraa i to te feia i hinaaro ru i te tauturu haafatataraa ˈtu ia ˈna. (Luka 5:12, 13; 8:43-48) Ua haapao oia i te feia e hinaaro taa ê to ratou. (Mar. 7:31-35) Ua ite maite oia i te huru aau o vetahi ê e ua haapao atu oia. Aita oia i hiˈo noa i te mea ta ˈna e ite ra. (Luka 7:36-40) Oia mau, ua faaite Iesu ma te tia roa i te aumihi î i te here o to tatou Atua.
3 “Aroha ˈtura”: Aita Iesu i rave i ta ˈna taviniraa no te mea noa e e hopoia tera na ˈna. Ua “aroha ˈtura” oia i te taata. (Mar. 6:34) Hoê â huru i teie mahana, aita tatou e afai noa ra i te hoê poroi, te tamata atoa ra râ tatou i te faaora i te taata. E feruri anaˈe no te aha te taata e ohipa ˈi mai ta ratou e rave ra. No te aha ratou e tapitapi ai aore ra e haapeapea ˈi? Ua faaruehia e ua haapoirihia anei ratou e te mau tiai mamoe faaroo haavare? E nehenehe to tatou anaanatae haavare ore ia vetahi ê e turai ia ratou ia faaroo i te parau apî maitai.—Kor. 2, 6:4, 6.
4 E haaputapû te aumihi i te mafatu. Ei faahohoˈaraa: Ua mauiui te hoê vahine i te poheraa peapea o ta ˈna tamahine e toru avaˈe. I te patotoraa ˈtu e piti na Ite i to ˈna opani, ua faatomo mai oia ia raua ma te hinaaro e patoi i ta raua mau parau no nia i te tumu e faatia ˈi te Atua i te mauiui. Ua parau râ te vahine ra i muri aˈe e: “Ua faaroo mai raua ia ˈu ma te aumihi rahi, e i to raua haereraa ˈtu, no to ˈu oaoa rahi, ua farii au i te tahi atu farereiraa.” E tutava anei oe i te faaite i te aumihi i te taata atoa ta oe e farerei i roto i te taviniraa?
5 E tauturu mai te atuaturaa i te aumihi ia tufa i te tamahanahanaraa mau na vetahi ê. I te na reiraraa, te faahanahana ra tatou i “te tumu o te aroha,” o Iehova.—Kor. 2, 1:3.