A haapii i te feia aau mǎrû ia haere na to te Atua eˈa
1. Ua taaihia te faariroraa i te taata ei pǐpǐ i te aha?
1 Ua parauhia te mau pǐpǐ a te Mesia no te senekele matamua e melo no “Te Eˈa.” (Ohi. 9:2, MN) Ua taaihia te oraraa taatoa o te hoê taata i te Kerisetianoraa mau. (Mas. 3:5, 6) No reira, ia faatere tatou i te mau haapiiraa bibilia, eita e navai noa ia faaite i te ite mau o te haapiiraa o te Bibilia. E mea tia atoa ia tauturu tatou i te mau piahi Bibilia ia haere na to Iehova eˈa.—Sal. 25:8, 9.
2. Eaha te nehenehe e turai i te hoê piahi Bibilia ia haapao i ta te Atua parau aore ra faaueraa?
2 Te here ia Iehova e ia Iesu: Auê ïa tautooraa no te mau taata tia ore ia taui i to ratou feruriraa, huru, ta ratou paraparau, e to ratou haerea ia au i te hinaaro o te Atua e! (Roma 7:21-23; Eph. 4:22-24) E turai râ te hinaaro, aore ra here, i te Atua e ta ˈna Tamaiti i te feia aau mǎrû ia rave i teie tautooraa. (Ioa. 14:15; Ioa. 1, 5:3) E nafea tatou e nehenehe ai e tauturu i ta tatou mau piahi Bibilia ia atuatu i teie here?
3. E nafea tatou e nehenehe ai e tauturu i te mau piahi ia atuatu i te here ia Iehova e ia Iesu?
3 A tauturu i ta outou piahi ia ite i to Iehova huru. Ua faataa te hoê taeae e, “Eita te mau taata e nehenehe e here i te hoê taata ta ratou i matau ore, no reira, i te omuaraa mai iho â o te haapiiraa, e haapii au ia ratou o vai te iˈoa o te Atua i roto i te Bibilia, a imi atu ai i te mau ravea no te haamahitihiti i to Iehova mau huru maitatai.” Te haamataratararaa i to Iesu hiˈoraa, e ravea maitai roa ïa no te na reira. (Ioa. 1:14; 14:9) Hau atu â, a faaohipa i te haamanaˈoraa tarenihia i te hopea o te pene taitahi o te buka ra Bibilia haapii no te tauturu i te piahi ia feruriruri i te mau huru maitatai faahiahia o te Atua e o ta ˈna Tamaiti.
4. (a) No te aha mea rahi ai te piahi o te manaˈo ra e e tautooraa ia poro? (b) E nafea tatou e nehenehe ai e tauturu i ta tatou mau piahi a haamata ˈi ratou i te apiti i te taviniraa Kerisetiano?
4 A haapii na roto i te hiˈoraa: Ei orometua haapii e ei aratai, e faaite tatou ia vetahi ê na roto i ta tatou mau ohipa eaha te auraa e haere na to te Atua eˈa. (Kor. 1, 11:1) Ei hiˈoraa, aita te rahiraa o te mau piahi Bibilia i matau i te paraparau i te mau taata ěê no nia i ta ratou mau tiaturiraa. No reira, e titauhia paha te faaoromai e te aravihi no te tauturu ia ratou ia faahotu i te here, te faaroo, e te itoito e hinaarohia no te apiti i te ohipa pororaa e te faariroraa i te taata ei pǐpǐ. (Kor. 2, 4:13; Tes. 1, 2:2) E turai to tatou hinaaro e aratai i ta tatou mau piahi ia tatou ia haere na muri ia ratou a haamata ˈi ratou i te apiti i te taviniraa Kerisetiano.
5. E nafea te hoê hiˈoraa maitai e tauturu ai i te mau piahi ia ite eaha tei taaihia i te peeraa i ta te Atua faaueraa?
5 E nehenehe to outou hiˈoraa e haapii i te mau piahi i te tahi atu mau tuhaa faufaa o te oraraa Kerisetiano. Ia haere outou e hiˈo i te taata maˈi aore ra ia farii outou ia vetahi ê ma te mahanahana i te mau putuputuraa a te amuiraa, e ite ratou i te aroha, aore ra here, i te ohiparaa. (Ioa. 15:12) Ia apiti outou i te tamâraa i te Piha a te Basileia aore ra ia rave outou i te ohipa no te tauturu ia vetahi ê, te haapii ra ïa outou ia ratou e nafea ia tavini. (Ioa. 13:12-15) Ia hiˈopoa ratou e e oraraa ohie noa to outou, e taa ia ratou eaha te auraa ‘e mata na i te imi i te basileia.’—Mat. 6:33.
6. Eaha te faahopearaa ia tauturu tatou i te feia aau mǎrû ia tavini ia Iehova?
6 E tutavaraa rahi ta te ohipa haapiiraa ia vetahi ê i te Parau a te Atua e te faariroraa i te taata ei pǐpǐ e titau ra. E mea oaoa râ ia ite i te feia aau mǎrû ‘ia haapao i te parau mau’!—Ioa. 3, 4.