Te pororaa i te Basileia: te hoê fanaˈoraa taa ê faufaa roa
1 I te mau mahana atoa, te fanaˈo ra e mau miria taata i te mau faanahoraa horoa maitai ta Iehova i rave ia nehenehe ratou ia ora noa. (Mat. 5:45) Tera râ, e mea iti roa o te faaohipa nei i te fanaˈoraa taa ê otahi e faaite i to ratou mauruuru i to ratou Atua Poiete ra ma te poro i te parau apî maitai o te Basileia o te Atua. (Mat. 24:14) Eaha te faufaaraa o teie fanaˈoraa taa ê faufaa roa no outou?
2 Te faahanahana ra te pororaa i te Basileia i te Atua e te horoa ra i te tiaturiraa e te hau i te feia ta teie anotau arepurepu e haamauiui ra. (Heb. 13:15) No te feia e farii maitai ra i te poroi, e fanaˈo ïa ratou i te ora mure ore. (Ioa. 17:3) Teihea toroa aore ra ohipa e pûpû mai i taua mau haamaitairaa ra? Ua rave te aposetolo Paulo i ta ˈna taviniraa ma te hoê huru o tei haapapu e mea poihere na ˈna te reira; ua faariro oia i te reira mai te hoê taoˈa.—Ohi. 20:20, 21, 24; Kor. 2, 4:1, 7.
3 E poihere anaˈe i teie fanaˈoraa taa ê faufaa roa: E itehia iho â e te haafaufaa ra tatou i te fanaˈoraa taa ê e poro i roto i te huru maitai o ta tatou taviniraa. Te rave ra anei tatou i te taime no te faaineine i te hoê faaiteraa o te haaputapû i te aau o te feia e faaroo maira? E nehenehe anei tatou e haamaitai i to tatou aravihi i te faaohipa i te mau Papai e te haaferuri i te mau taata? Te rave hope ra anei tatou i te tuhaa fenua i horoahia mai? E nehenehe anei ta tatou e haamata e e faatere i te hoê haapiiraa bibilia? Mai te mau Kerisetiano taiva ore, i mutaa iho e i teie tau, te faaitoito nei te hoê hiˈoraa maitai i teie ohipa ia tatou, e te poihere nei tatou i teie fanaˈoraa taa ê.—Mat. 25:14-23.
4 Te faaruru ra anei tatou i te mau faahopearaa o te ruhiruhiaraa? Mea maˈimaˈi anei tatou, aore ra te faaruru ra anei tatou i te tahi atu mau fifi? Mai te peu e e, mea mahanahana ia ite e mea faufaa mau ta tatou mau tutavaraa atoa no te apiti i te taviniraa. Te haapapu maira te Parau a te Atua e mea faufaa roa no Iehova ta tatou mau tutavaraa no te tavini ia ˈna, noa ˈtu e mea haihai no te tahi atu mau taata.—Luka 21:1-4.
5 E hopoi mai te pororaa i te Basileia i te mauruuru rahi. Teie ta te hoê tuahine e 92 matahiti to ˈna i parau: “Auê ïa oaoaraa ia haamanaˈo i ta ˈu na matahiti e 80 i roto i te taviniraa taiva ore i te Atua, ma te ore e tatarahapa! Ahiri e e nehenehe ta ˈu e ora faahou i to ˈu oraraa, e na reira faahou vau no te mea ‘e maitai rahi to te hamani maitai o te Atua i te ora.’ (Sal. 63:3) Mai teie tuahine, e poihere anaˈe i te fanaˈoraa taa ê faufaa roa ta te Atua i horoa mai: te pororaa i te Basileia.