Te hoê ripene video o te haamahitihiti i te tauiraa faufaa i te pae rapaauraa
Te tâuˈa rahi noa ˈtura te mau paruru e te feia toroa o te ea i te manaˈo haava e te tiaraa o te taata maˈi. Ua faatupu te reira i te haereraa i mua i te pae rapaauraa e o te mau ravea apî ta te mau Ite no Iehova e nehenehe e fanaˈo. (Ohi. 15:28, 29) O te tumu parau ïa o te ripene video Soigner sans transfuser—Besoins et droits du patient. A mataitai i te reira, i muri iho a feruri i ta outou i haapii mai.—Nota: I te mea e te vai ra te tahi mau hohoˈa poto e faaite ra i te mau tâpûraa maˈi, na te mau metua ïa e faaoti mai te peu e e mataitai ratou i te reira e te mau tamarii rii.
(1) No te aha te feia toroa i te pae rapaauraa e uiui ai no nia i te maitai mau o te mau pâmuraa toto? (2) A horoa e toru hiˈoraa o te mau tâpûraa maˈi fifi e nehenehe e ravehia aore e pâmuraa toto. (3) Ehia rahiraa taote e taote tâpû na te ao nei e farii i te rapaau i ta ratou mau taata maˈi aore e pâmuraa toto? No te aha ratou i ineine ai i te na reira? (4) Eaha ta te mau maimiraa apî no nia i te faaohiparaa i te toto i roto i te mau fare maˈi i faaite mai? (5) Eaha te mau fifi i taaihia i te mau pâmuraa toto? (6) No nia i te mau maitai o te mau ravea ê atu i te pâmuraa, eaha te faaotiraa a te feia toroa aravihi e rave rahi? (7) Na te aha e faatupu i te anemia? Eaha te faito anemia ta te tino e nehenehe e farii? Eaha te nehenehe e ravehia no te faatitiaifaro i te reira? (8) E nafea e nehenehe ai e faarahi i te mau toropuru ura o te hoê taata maˈi? (9) Eaha te mau ravea e faaohipahia ra no te faaiti i te mau pauraa toto i te roaraa o te hoê tâpûraa? (10) E mea papu anei te mau ravea ê atu i te pâmuraa toto no te mau tamarii rii aore ra ia fifihia te ora iho o te taata maˈi? (11) Eaha te faaueraa tumu morare matamua e mea tia ia haapaohia no te hoê rapaauraa maitai? (12) No te aha e mea faufaa ˈi ia feruri atea te mau Kerisetiano i ta ratou mau maitiraa i te pae rapaauraa ma te ore e faaohipa i te toto? E nafea ïa?
Na te taata taitahi e faaoti no ˈna iho, ia au i to ˈna manaˈo haava haapiihia e te Bibilia, e farii anei oia aore ra eita vetahi mau rapaauraa faahitihia i roto i te ripene video. Ua feruri anei outou i te mau ravea ê atu i te pâmuraa ta outou e hinaaro e farii no outou e no ta outou mau tamarii? E mea tia ia haamaramarama-maitai-atoa-hia te mau melo o to outou utuafare e ere i te mau Ite no nia i ta outou mau faaotiraa e te tumu o te reira.—A hiˈo i te tumu parau “Uiraa a te feia taio” i roto i Te Pare Tiairaa o te 15 no Tiunu 2000 (aore ra 1 no Tiurai 2004) e o te 15 no Atopa 2000.