E ora anaˈe ia au i ta tatou pûpûraa ia tatou na te Atua
1 Ua bapetizohia tatou aita i maoro aˈenei aore ra e rave rahi matahiti i te maoro, te haamanaˈo papu ra tatou i taua tupuraa faufaa ra o to tatou oraraa. E ere râ to tatou bapetizoraa i te hopea, o te haamataraa râ o te hoê taviniraa itoito o te vai e a muri noa ˈtu. (Ioa. 1, 2:17) Eaha te auraa e ora ia au i ta tatou pûpûraa ia tatou na te Atua?
2 E pee anaˈe i te hiˈoraa o te Mesia: Na roto i te bapetizoraa ia ˈna, ua ‘haamata Iesu i ta ˈna ohipa’ ma te faaite i “te parau maitai o te basileia o te Atua.” (Luka 3:23, MN; 4:43) Oia atoa, ma te faataipe i ta tatou pûpûraa ia tatou na Iehova na roto i te bapetizoraa, ua riro tatou ei mau tavini faatoroahia no te parau apî maitai. Noa ˈtu e mea titauhia ia horoa ˈtu â tatou i te taime e ia haa puai ia noaa mai te mau mea faufaa e hinaarohia, ta tatou ohipa tumu aore ra ohipa matamua, o te taviniraa Kerisetiano ïa. (Mat. 6:33) Maoti i te aruaru i te mau taoˈa aore ra te hanahana, te tutava ra te feia i pûpû ia ratou na te Atua i ‘te haamaitai i to ratou toroa,’ mai te aposetolo Paulo. (Roma 11:13) Te poihere ra anei tatou i ta tatou fanaˈoraa taa ê e tavini ia Iehova ma te horoa i te mea maitai roa ˈˈe?
3 Mai te hiˈoraa o Iesu, ia ‘patoi atu tatou i te diabolo’ e tia ˈi. (Iak. 4:7) Mai ia ˈna atoa i tamata ia Iesu i muri aˈe i to ˈna bapetizoraa, te tiatonu ra Satani i teie mahana i te mau tavini pûpûhia na Iehova. (Luka 4:1-13) I te mea e te ora nei tatou i roto i te ao a Satani, ia haavî ïa tatou ia tatou e ia ape i te mau mea atoa o te nehenehe e faaino i to tatou feruriraa aore ra e haaviivii i to tatou mafatu e tia ˈi. (Mas. 4:23; Mat. 5:29, 30) Te faaitoitohia ra te mau Kerisetiano eiaha “ia amu i te amuraa a [Iehova] ra, e te amuraa a te mau demoni.” (Kor. 1, 10:21; MN) Te auraa, ia haapae ïa i te mau faaanaanataeraa viivii, te mau amuiraa iino, te mau atâtaraa o te Internet e ia ape i te mau mea atoa no ǒ mai i te mau apotata ra. Ma te ara maite i taua mau marei ra e te tahi atu mau raveraa a Satani, e nehenehe tatou e ora maitai aˈe ia au i ta tatou pûpûraa ia tatou na Iehova.
4 E haafaufaa anaˈe i te mau faanahoraa a te Atua: No te tauturu ia tatou ia ora ia au i ta tatou euhe, te turu ra Iehova ia tatou na roto i ta ˈna Parau e te amuiraa Kerisetiano. E faariro anaˈe i te taioraa bibilia e te pure ei peu matau i te mau mahana atoa. (Ios. 1:8; Tes. 1, 5:17) E oaoa anaˈe i te haere i te mau putuputuraa a te amuiraa. (Sal. 122:1) E amuimui anaˈe i te feia o te mǎtaˈu ra ia Iehova e o te haapao ra i ta ˈna mau faaueraa.—Sal. 119:63.
5 Maoti taua turu ra e nehenehe ai tatou e ora ia au i ta tatou pûpûraa ia tatou na Iehova e e oaoa i te taviniraa ia ˈna a tau a hiti noa ˈtu.—Sal. 22:26, 27; Phil. 4:13.