Te hoê ohipa o te titau i te haehaa
1 Te faaue maira te Parau a te Atua e riro ei ‘aau [haehaa], eiaha e tahoo atu i te ino i te ino, ei haamaitai râ.’ (Pet. 1, 3:8, 9; MN) Mea papu maitai e e au teie aˈoraa i te ohipa pororaa. Oia mau, e nehenehe te taviniraa Kerisetiano e tamata i to tatou haehaa.
2 Te haehaa, o te hoê ïa huru maitai o te tauturu ia faaoromai i te mau tupuraa au ore. I roto i te pororaa, e paraparau tatou i te taata aita tatou i matau ma te ore e titau-manihini-hia mai, ma te ite e e iria mai te tahi pae. Mea titauhia te haehaa no te poro tamau noa ˈtu tera huru. I roto i te hoê tuhaa fenua fifi iho â râ, ua haere e piti pionie i tera fare i tera fare i te mau mahana atoa i te roaraa e piti matahiti ma te ore e fariihia e te taata! Teie râ, ua tamau maite raua, e i teie mahana, te vai ra e piti amuiraa i roto i taua tuhaa fenua ra.
3 E nahea i mua i te ite ore i te peu maitai: E tauturu te haehaa ia tatou ia pee ia Iesu ia au ore mai te tahi atu mau taata aore ra mea ite ore i te peu maitai. (Pet. 1, 2:21-23) I ǒ na hoa faaipoipo e piti, ua parau-ino-hia te hoê tuahine, na mua na te vahine e i muri aˈe na ta ˈna tane, o tei faaue ia ˈna ia haere atu. Ua ataata noa te tuahine e ua parau oia e te tiaturi ra oia e paraparau ia raua i te tahi atu taime. Ua maere roa raua e, i te haere-faahou-raa mai te hoê Ite i to raua uputa, ua faaroo raua ia ˈna e ua farii i te hoê titau-manihini-raa e haere i te hoê putuputuraa i te Piha a te Basileia. Tei reira te tuahine o tei tiahihia no te farii ia raua e no te poro hau atu â. E nehenehe tatou atoa e tamǎrû i te taata aita e farii ra ma te faaite i te “mǎrû e te auraro maite.”—Pet. 1, 3:15; Mas. 25:15.
4 E haapae anaˈe i te aau faateitei: E ere no te mea ua ite tatou i te Bibilia e au ore ai tatou i te taata aore ra e paraparau ai tatou no nia ia ratou ma te au ore. (Ioa. 7:49) Te aˈo maira râ te Parau a te Atua “eiaha roa e parau ino i te taata atoa ra.” (Tito 3:2) Ei taata aau haehaa, mai ia Iesu, e tamahanahana tatou i to tatou mau taata-tupu. (Mat. 11:28, 29) E anaanataehia ta tatou poroi maoti te hoê haerea haehaa.
5 Oia, e tauturu te haehaa ia tatou ia tamau maite i roto i te mau tuhaa fenua fifi. E nehenehe oia e tamǎrû i te taata aita e farii ra e e aratai ia vetahi ê i te poroi o te Basileia ra. Hau roa ˈtu â, mea au na Iehova, o te ‘horoa i te maitai no tei haehaa,’ te reira.—Pet. 1, 5:5.