Te faaohipa ra anei outou i ta outou i haapii i te tairururaa mataeinaa “Orometua haapii i te Parau a te Atua”?
1 Ua nehenehe te feia atoa i haere i te tairururaa mataeinaa i teie matahiti e ite e ua faaoti papu te mau tavini a Iehova e rave i ta ratou ohipa faauehia ei orometua haapii i te Parau a te Atua. (Mat. 28:19, 20) I to outou hoˈiraa i te fare, eaha te tahi mau haapiiraa taa ê ta outou i faaoti papu e faaohipa i roto i to outou oraraa aore ra i roto i ta outou taviniraa?
2 Mea faufaa te mau Papai faauruahia ei haapiiraa: Te haamataratara ra te manaˈo tumu o te mahana matamua i te Timoteo 2, 3:16. Ua faaite mai te oreroraa parau tumu e ia ‘faaineine-maite-hia tatou ei orometua haapii i te Parau a te Atua,’ e tia ia tatou ia haafaufaa rahi, ia faatura hau aˈe i te reira i te mau manaˈo aore ra te mau tutuu atoa a te taata e ia faaohipa i te reira ma te haapao maitai. E tia atoa ia tatou ia pure i te mau mahana atoa ia tauturu mai te varua moˈa ia tatou i roto i ta tatou taviniraa e ia faaitoito i te faatupu i ta ˈna hotu maitai roa: te here. E tia atoa ia tatou ia vaiiho e na te faanahonahoraa a Iehova i te fenua nei e faaineine ia tatou ei mau tavini na roto i te mau putuputuraa atoa a te amuiraa.
3 I te Mahana pae, ua faataa mai te oreroraa parau e toru tuhaa “Haapiiraa ia tatou iho a haapii ai ia vetahi ê” i te faufaaraa ia horoa i te hiˈoraa maitai (1) na roto i te haapao-maite-raa i te mau ture a te Atua i roto i te mau tuhaa atoa o te morare Kerisetiano, (2) na roto i te haamatau-noa-raa i te haapii e (3) na roto i te patoiraa i te mau manaˈo aore ra te mau huru o te aau aore ra te huru feruriraa ta te Diabolo e nehenehe e faaohipa no te haaparuparu ia tatou. I muri iho, ua faataahia te tahi mau ravea ohie e paruru ai tatou i te mau melo o to tatou utuafare i te ati i parare i te ao atoa, te hohoˈa faufau. Ua faaitoitohia te mau metua ia horoa i te hiˈoraa na roto i te oreraa e hiˈo atu, noa ˈtu maa taime poto, i te hoê hohoˈa o te taatiraa e ia haapao maitai i ta ratou mau tamarii ia faaohipa ratou i te Internet e te afata teata. Eaha te mau manaˈo i hohorahia i te Mahana pae ta outou i haamata i te faaohipa?
4 Ua haamataratara te oreroraa parau hopea o te mahana i ta tatou faaotiraa papu e poihere i te maramarama no ǒ mai ia Iehova ra, e vai piri noa i te pǔpǔ haapao maitai o te feia faatavaihia o te Atua e e faatupu i te hau e fanaˈohia ra e te nunaa o Iehova. Ua taio anei outou i te buka apî ra La prophétie d’Isaïe, lumière pour tous les humains II?
5 Au maite ia haapii atu ia vetahi ê: O te Timoteo 2, 2:2 te irava tumu no te piti o te mahana. A faaroo ai outou i te oreroraa parau e toru tuhaa o te poipoi Mahana maa, ua tapao anei outou i te tahi mau manaˈo tauturu i horoahia, nafea (1) ia imi i te feia e au, (2) ia atuatu i to ratou anaanatae e (3) ia haapii ia ratou ia haapao i te mau faaueraa atoa a te Mesia? Te faaohipa ra anei outou i ta outou i haapii: na roto i te faaiteraa ˈtu i te taata hoê aˈe manaˈo no roto i te mau Papai e ia faanaho i te hoê farerei-faahou-raa?
6 Ua haapapu te mau oreroraa parau o te avatea i te faufaaraa ia pee i te Orometua Rahi ra o Iesu. Nafea outou e tutava ˈi i te pee roa ˈtu â ia ˈna? Ia au i ta outou i faaroo i roto i te piti o te oreroraa parau e toru tuhaa o te mahana, nafea outou e ‘faufaahia ˈtu â ˈi i te haapiiraa teotaratia’? Eaha te tahi mau manaˈo tauturu ta outou i faaohipa ia maoro atu â outou i te haapao maitai i ta outou haapiiraa no outou iho aore ra i te faaroo maitai i te mau putuputuraa a te amuiraa?
7 Aita e feaaraa e e tauturu mai te buka apî ra Tirez profit de l’École du ministère théocratique ia tatou ia riro ei mau taata orero e ei mau orometua haapii aravihi atu â i te Parau a te Atua. E haapao atu â ïa tatou i te mau huru maitai i te pae oreroraa o te mau tavini haapao maitai a te Atua i te tau bibilia ra. I roto i te haapiiraa taitahi o te buka apî, te vai ra te mau tumu parau tarenihia o te faataa maitai ra eaha te tia ia tatou ia rave, no te aha mea faufaa te reira e nafea ia rave atu. Ua faanaho-atoa-hia te tahi mau faaineineraa. E nehenehe te mau tuahine e maiti hoê o na 29 huru tupuraa e pûpûhia ra ia hohora ratou i ta ratou tumu parau. I muri aˈe, e ravehia te mau tauiraa i faaarahia i te pae o te tereraa o te haapiiraa. Ua haamatau anei outou i te haapii e i te faaineine ia faufaa-roa-hia outou i te Haapiiraa o te Taviniraa i te mau hebedoma atoa?
8 A riro ei orometua haapii ua navai hoi te maoro: No te Tapati, na te Hebera 5:12 i faaineine i te feruriraa o te feia e faaroo ra. I te poipoi, ua faaitoito mai te oreroraa parau e toru tuhaa “E faaineine te parau tohu a Malaki ia tatou no te mahana o Iehova” ia horoa tatou i te mea maitai roa ˈˈe na Iehova e ia riri tatou i te mau huru haavare atoa no te ora ˈtu i te mahana rahi riaria o Iehova. Ua faaite mai te darama “A faatura i te mana o Iehova” ma te puai nafea te teoteo, te nounou tiaraa, te pohehae e te haapao maitai tano ore i turai ai ia Kora e to ˈna mau taata i tahito ra ia patoi roa ˈtu ia Iehova iho. Ua haapapu te oreroraa parau i muri iho i te faufaaraa no tatou taitahi, ei utuafare e ei amuiraa, ia auraro i te mana no ǒ mai i te Atua ra. Na roto i te tahi mau tupuraa, ua faaite mai te oreroraa parau no te taatoaraa “O vai teie e haapii nei i te parau mau i te mau nunaa atoa?” e o te mau Ite no Iehova teie e haapii nei i te parau mau bibilia ia vetahi ê, e ere râ te Amuiraa faaroo Kerisetiano o te faahua parau ra e te na reira ra ratou.
9 Mea maramarama maitai e te faaineine ra Iehova ia tatou ia riro ei mau orometua haapii maitai aˈe i ta ˈna Parau. E faaohipa anaˈe ïa i ta tatou e haapii ra, na roto i te ‘ara-noa-raa ia tatou e i ta tatou haapiiraa, tei te na reira hoi e ora ˈi tatou e te feia atoa e faaroo mai ia tatou.’—Tim. 1, 4:16.