Na te hinaaro e turai ia tatou ia poro
1 Ei Ite no Iehova, ua matauhia tatou no to tatou itoito i roto i te pororaa i te poroi o te Basileia. (Mat. 24:14) I roto i te ao, ua hau atu tatou i te ono mirioni o te haa ra i roto i taua ohipa ra, e e amuihia mai te mau taata apî i taua numera ra i te taime a apiti ai ratou i roto i ta tatou pororaa. Ua taiohia ïa taua mau numera ra ia au i te apiti-mau-raa i roto i taua ohipa ra.
2 No te aha tatou e rave ai i taua ohipa fifi ra? Aita tatou e rave ra i te reira ma te faahepohia, aita atoa tatou e imi ra ma te haavarevare i te tahi maitai materia aore ra te tahi hanahana taa ê. I te omuaraa ra, mea mamahu te rahiraa o tatou no te mea ua manaˈo ratou e eita e maraa ia ratou e ua farerei pinepine ratou i te taata farii ore. (Mat. 24:9) Aita e taa ra i te rahiraa o te feia ta tatou i matau eaha te turai ra ia tatou. E tumu faufaa râ ta tatou no te tamau noa.
3 Te mana o te hinaaro: Ua faaite Iesu i te ture rahi roa ˈˈe ma te parau e ‘e tia ia tatou ia hinaaro ia Iehova ma to tatou aau atoa, ma to tatou [nephe] atoa, ma to tatou manaˈo atoa e ma to tatou puai atoa.’ (Mar. 12:30; MN) Ua aˈahia to tatou hinaaro ia Iehova i roto i to tatou mauruuru rahi no to ˈna huru e to ˈna tiaraa—te Arii e Fatu, te Atua Poiete o te mau mea atoa, o te ‘au ia ˈna te hanahana, te tura e te mana.’ (Apo. 4:11) Aita to to ˈna mau huru maitatai e faaauraa.—Exo. 34:6, 7.
4 Ua ite e te hinaaro ra tatou ia Iehova, na te reira e turai ia tatou ia faaanaana i to tatou maramarama i mua i te taata ma te arue ia ˈna i mua ia ratou, ma te paraparau no nia i ta ˈna mau ohipa faahiahia e ma te faaite i te poroi no nia i to ˈna Basileia. (Mat. 5:16) Mai te melahi e maue ra na ropu i te reva, e ‘[parau apî maitai mure ore] ta tatou ei pororaa ˈtu ei [parau apî maitai] i te mau fenua atoa, e te mau opu atoa, e te mau reo atoa, e te mau nunaa atoa.’ (Apo. 14:6; MN) O te hinaaro te tumu o te ohipa pororaa na te ao atoa nei.
5 Ua faariro-roa-hia teie ohipa mai te hoê “parau maamaa” faufaa ore. (Kor. 1, 1:18) Ua tamata-atoa-hia i te haamamû i te reira. E turai to tatou here taiva ore ia tatou ia parau, mai te mau aposetolo, e: “E ore hoi matou e tia ia ore ia parau i ta matou i hiˈo aˈenei, e ta matou i faaroo aˈenei. . . . O te Atua ta matou e faaroo e tia ˈi eiaha te taata.” (Ohi. 4:20; 5:29) Noa ˈtu te patoiraa, te tere maitai roa nei te pororaa na te ao atoa nei.
6 Mai te hoê auahi ama, te faahepo ra to tatou hinaaro ia Iehova ia tatou ia faaite i to ˈna mau maitai. (Ier. 20:9; Pet. 1, 2:9) E tamau noa tatou i te ‘faaite i te taata i ta ˈna mau ravea puai no te mau ravea maitai hau ê na ˈna ra.’—Isa. 12:4, 5.