Ia riro tatou ei taata rave oaoa
1 Ua faataa Iesu e i roto i to ˈna vairaa mai, mai te tau atoa o Noa, ‘eita roa’ te rahiraa o te taata ‘e haapao.’ (Mat. 24:37-39, MN) E ere ïa i te mea maere e aita te taata e rave rahi e faaroo nei i te parau apî maitai o te Basileia. Nafea ïa ia tamau noa i te poro ma te oaoa?—Sal. 100:2.
2 A tahi, e tia ia tatou ia haamanaˈo e no ǒ mai ta tatou poroi e ta tatou ohipa i te Atua ra. Ia ore te hoê taata e hinaaro e faaroo ia tatou noa ˈtu ta tatou mau tutavaraa atoa, o Iehova mau ta ˈna e patoi ra. E haamanaˈo anaˈe e e oaoa Iehova i te ite ia tatou ia rave ma te taiva ore i ta tatou taviniraa; e tamau noa ïa tatou ei taata rave i te parau e oaoa roa ra.—Iak. 1:22, 25.
3 A piti, te toe ra te mau taata o te farii i te ravea faaoraraa faanahohia e te Atua. Noa ˈtu â aita te rahiraa o te taata e tâuˈa ra, te toe ra te tahi mau mamoe e tia ia haaputuputuhia, oia atoa i teie mahana, noa ˈtu â te ora nei tatou i te tau hopea roa. E tia ia tatou ia poro, e ia poro â, e i roto “i te oire e te oire iti” ta tatou e tomo, “e [imi] atu i to reira taata au.”—Mat. 10:11-13; MN.
4 E tapea anaˈe i te feruriraa maitai: Ua inoino vetahi mau taata no te mau ohipa iino a te haapaoraa hape. ‘Ua purara e ua faarue-taue-hia’ vetahi atu e te faanahoraa o te mau mea. (Mat. 9:36) Te hepohepo ra e rave rahi, no te ohipa ore, te maˈi aore ra te papu-ore-raa. E feruri anaˈe i te reira; e turai te reira ia tatou ia tamau noa i roto i ta tatou ohipa. E tutava anaˈe i te haamata i te tahi mau aparauraa i nia i te mau tumu parau o te haapeapea rahi roa ˈˈe i te mau taata o ta tatou tuhaa fenua. E tauturu anaˈe ia ratou ia taa e o te Basileia o te Atua te ravea otahi. E haaputapû anaˈe i to ratou mafatu na roto i te faaiteraa i te mau Papai e te mau manaˈo papu i roto i te mau papai.—Heb. 4:12.
5 Te haamanaˈo noa ra te feia rave i te parau a te Atua e oaoa ra i teie mau parau: “O te oaoa . . . no ǒ ia Iehova ra, to outou ïa [pare etaeta].” (Neh. 8:10; MN) Aita e tumu e ere ai tatou i te oaoa. “Te au ra taua fetii ra, o te ora ta outou i hinaaro no ratou ra, e tae ïa i nia ia ratou: ia ore râ ia au, e hoˈi mai ïa ora i nia ia outou iho.” (Mat. 10:13) Mai te peu e e pûpû tatou ma te faaoromai i te hoê taviniraa moˈa na ˈna, e faaapî Iehova i to tatou oaoa e to tatou puai, e e haamaitai mai oia i to tatou haapao maitai.