Pahonoraa i ta outou mau uiraa
◼ No te aha mea maitai e ia hiˈo te feia i putuputu mai i te mau irava Bibilia ia ani mai te taeae orero?
No te ite eaha te mau irava Bibilia ta te feia e faaroo ra e titau-manihini-hia e hiˈo, e tia ïa ia uiui eaha te tumu parau e hohorahia ra e e hiˈopoahia anei te mau irava taitahi o te hoê tuhaa o te Parau a te Atua i roto i te oreroraa parau.
E haamau te taioraa i te mau irava i te niu Bibilia o te mau manaˈo e vauvauhia ra. (Ohi. 17:11) E haapaari atoa te reira i te faaroo o te feia atoa e faaroo ra ma te paturu i te mau manaˈo e faaitehia ra e te mau haapapuraa Bibilia. Na roto i te peeraa i te taioraa o te hoê irava faufaa, e ite ratou iho eaha mau na ta te Bibilia e parau ra, na te reira e haaputapû roa ˈtu â ia ratou. Hau atu â, mea maitai ia rave i te tahi mau tapaopaoraa e ia pee i te anairaa o te mau manaˈo.
E rave rahi paha irava Bibilia i roto i te tino parau i horoahia e te Taiete, na te taeae orero iho râ te reira, no te tauturu ia ˈna ia faaineine i ta ˈna oreroraa parau. E horoa te reira i te tahi mau haamaramaramaraa hau, e tauturu ia ˈna ia maramarama i te mau faaueraa tumu Bibilia papu ore e ia taa ia ˈna i te vauvauraa o te tumu parau. E maiti te taeae orero i te mau irava faufaa no te oreroraa parau e e ani oia i te feia e faaroo ra ia pee i te taioraa e te faataaraa. E nehenehe atoa e faahiti aore ra e haapoto noa i te tahi atu mau irava e paturu ra i te hoê manaˈo, eita râ e titauhia i te feia e faaroo ra ia pee i te taioraa.
E taio te taeae orero i te mau irava i roto i te Bibilia, eiaha râ mai roto mai i te hoê neneiraa a te roro uira. Mai te peu e e titau manihini oia i te feia e faaroo ra ia pee i te taioraa, e faaite maitai oia i te iˈoa o te buka, te pene e te aore ra te mau irava. A imi ai te feia i putuputu mai i te irava, e nehenehe oia e ui i te hoê uiraa aore ra e faataa poto noa i te tumu o taua irava ra. Na roto i te parau-faahou-raa i te mau irava, e tauturu ïa i te feia e faaroo ra ia haamanaˈo i te reira. Teie râ, mea au aˈe eiaha e horoa i te numera o te api, no te mea e tauiui te reira ia au i te neneiraa ta te feia i putuputu mai e faaohipa ra. Ma te pee i te taioraa o te mau irava ia titau-manihini-hia e rave, e faufaahia te feia i putuputu mai i te mana o te Parau a te Atua, a faataahia ˈi te reira i te roaraa o te oreroraa parau.—Heb. 4:12.