Pahonoraa i ta outou mau uiraa
◼ Ua ineine anei outou i te faaruru i te hoê rapaauraa ru?
I roto i te ao i teie nei tau, e pinepine “te taime e te tupuraa manaˈo-ore-hia” i te tuati e i te faatupu i te hoê rapaauraa ru, e tupuraa ïa o te faahepo i te taata maˈi ia farii i te pâmuraa toto. (Koh. 9:11, MN) Ia ineine tatou no taua tupuraa ra, te pûpû mai nei Iehova i to ˈna turu i roto i te mau tuhaa rau maoti ta ˈna faanahonahoraa, te hinaaro atoa nei oia e ia rave atoa tatou i ta tatou tuhaa. E tauturu te faahaamanaˈoraa i muri nei ia tatou.
• Ia vai noa i nia ia outou ta outou tareta apî “Instructions médicales/Pas de sang.”
• Ia papu ia outou e te vai noa ra i nia i ta outou mau tamarii te “Document d’identité médical” apî.
• A hiˈo faahou i te api hau o Te taviniraa o te Basileia no Setepa 1992 e a faaineine maitai ia outou nafea ia aparau atu i te hoê taote aore ra te hoê haava no nia i te mau rapaauraa te nehenehe e faaohipahia i nia i ta outou tamarii.
• A hiˈo faahou i te mau tumu parau no nia i te mau tuhaa toto aore ra te mau rapaauraa monoraa. (Te mau tumu parau e hiˈopoa faahou: Te Pare Tiairaa o te 1 no Atopa 1994, api 31; 1 no Tiunu 1990, mau api 30-31 [Farani]; 1 no Mati 1989, mau api 30-31 [Farani]; A ara mai na! o te 8 no Titema 1994, mau api 23-27 [Farani]; 8 no Atete 1993, mau api 26-29; 8 no Novema 1991, api 30; e Te taviniraa o te Basileia, mau api hau no Setepa 1992 e Novema 1990. A tuu i te reira i roto i te hoê vairaa parau ia ite oioi outou.)
• A faaoti ia au i to outou haava manaˈo e e nehenehe anei outou e farii i te tauturu a te mau matini no te faahaere i te toto i rapaeau i te tino e e nehenehe anei outou e farii i te tahi mau ravea rapaauraa e tuhaa toto to roto.
• Mai te peu e e nehenehe, hou outou e mau ai i te fare maˈi, a faaara i te mau matahiapo ia nehenehe ratou e tauturu ia outou e e farerei i te Tomite Tuatiraa e te Fare maˈi (CLH) mai te peu e e titauhia. Mai te peu e e mau te hoê tamarii i te fare maˈi, a ani i te mau matahiapo ia faaara oioi atu i te CLH.
A haapapu maitai e eita outou e hinaaro i te toto: Te faaite ra te tahi mau parau faataa e e tiai vetahi mau taeae e tuahine i te taime hopea no te faaite i te mau taote e eita ratou e hinaaro i te toto. E mea tano ore te reira i mua i te pǔpǔ utuutu maˈi e e riro paha outou i te pâmuhia i te toto. Mai te peu e ua ite te mau taote e ua haapapuhia to outou mau tiaturiraa e mau hinaaro e te tahi mau api parau tarimahia i reira to outou faahitiraa i ta outou mau faaueraa taa maitai, e nehenehe ïa ratou e rave oioi i ta ratou mau faanahoraa e e feruri pinepine i te tahi atu mau huru rapaauraa aita e toto to roto.
I te mea e e nehenehe te rapaauraa rû e fa mai i te mau taime atoa, e pinepine hoi ma te manaˈo-ore-hia, a rave i te tahi mau faanahoraa no te paruru i ta outou mau tamarii e outou iho i te hoê pâmuraa toto.—Mas. 16:20; 22:3.