Tauiraa no nia i te mau hora e titauhia i te mau pionie
1 Te mauruuru nei tatou paatoa i te mea e te rohi nei te mau pionie tamau e tauturu i roto i te amuiraa. Noa ˈtu e ua taotiahia te tuhaa fenua e te poro-tamau-hia ra i roto, te horoa ra te mau pionie i te hoê hiˈoraa maitai roa no te itoito i roto i te taviniraa o te Basileia. Te faaitoito nei ratou i te feia poro atoa ia tamau i te horoa i to ratou taime i roto i te maimiraa i te feia e “aau farii maitai, MN” to ratou.—Ohipa 13:48.
2 Te ite ra te Taiete e te rahi noa ˈtura te mau fifi e farereihia e te mau pionie, no te imi iho â râ i te hoê ohipa afa mahana o te nehenehe e tauturu ia ratou ia haapao i to ratou mau hinaaro e ia faaea noa i roto i te taviniraa ma te taime taatoa. Oia atoa, i roto e rave rahi mau fenua, no te fifi i te pae o te faanavairaa faufaa, mea fifi roa no te tahi feia poro ia riro ei pionie, noa ˈtu te hinaaro puai e vai ra i roto ia ratou. I teie mau avaˈe i mairi aˈenei, ua tuatapapa-maitai-hia teie mau tumu e te tahi atu â.
3 No reira, ua faaiti mai te Taiete i te faito hora a te mau pionie tamau e tauturu. Ia haamata te matahiti 1999, e titauhia i te mau pionie tamau ia faaî e 70 hora i te mau avaˈe atoa, oia hoi e 840 hora ïa i te matahiti hoê. Area no te mau pionie tauturu, e faaî ïa ratou e 50 hora i te avaˈe. No te mau pionie taa ê e te mau mitionare aita te mau titauraa i taui, inaha ua rave te Taiete i te tahi mau faanahoraa ia nehenehe ratou e haapao i to ratou mau hinaaro faufaa roa ˈˈe. E nehenehe ïa ratou e haamau i to ratou feruriraa i nia i te ohipa pororaa e faariroraa i te taata ei pǐpǐ.
4 Te tiaturi nei matou e e tauturu teie tauiraa no nia i te mau hora e titauhia, i te mau pionie e rave rahi ia tapea noa i ta ratou haamaitairaa faufaa roa o te taviniraa. E nehenehe atoa te reira e turai i te feia poro e rave rahi ia riro ei pionie tauturu aore ra tamau. Auê ïa haamaitairaa rahi no te mau melo tataitahi o te amuiraa!