Te oroa Haamanaˈoraa: e ohipa faufaa roa
1 I te Sabati 23 no Mati, i muri aˈe i te toparaa mahana, e faatupu tatou i te oroa Haamanaˈoraa o te poheraa o te Mesia. (Luka 22:19) Papu maitai, e oroa faufaa roa ˈˈe teie! Ma te tapea i to ˈna taiva ore ia Iehova e tae noa ˈtu i te pohe, ua faaite o Iesu e e nehenehe ta te hoê taata e tapea i to ˈna haapao maitai tia roa i te Atua, i mua atoa i te hoê huru tupuraa fifi roa, ma te turu i te tiaraa o te mana arii o Iehova. (Heb. 5:8) Hau atu, na roto i to ˈna pohe, ua horoa te Mesia i te tusia taata tia roa, titauhia no te hoo mai i te huitaata nei, e nehenehe ai te feia e faatupu ra i te faaroo, e ora e a muri noa ˈtu. (Ioa. 3:16) Na roto i to tatou haereraa i te oroa Haamanaˈoraa, te faaite ra tatou i to tatou mauruuru hohonu no te here o Iehova e no te tusia o Iesu no tatou nei.
2 Te faaitoitohia nei tatou paatoa, ia apee i te porotarama taioraa Bibilia, tei faataahia no te 18 e tae atu i te 23 no Mati, e o te vai atoa ra i nia i te Kalena a te mau Ite no Iehova 1997 (Farani). Hau atu, e tauturu te hoê aparauraa e te utuafare i nia i te mau pene 112-16 o te buka ra Te taata rahi roa ˈˈe i ora aˈenei, ia tatou ia haamau i to tatou feruriraa i nia i te hebedoma faufaa roa ˈˈe o te Aamu taatoa.
3 E nehenehe anei ta tatou e apiti hau atu â i roto i te pororaa i te tau o te oroa Haamanaˈoraa? I te avaˈe Mati, e rave rahi taata poro o te faaohipa roa i na hopea hebedoma e pae no te riro ei mau pionie tauturu. No te aha outou e ore ai e na reira atoa? E nehenehe ta tatou e rohi hau atu â no te faaite i te mau taata, e mea faufaa roa ia haere i te oroa Haamanaˈoraa. I te mea hoi e tupu te reira i te hoê Sabati, e mea ohie aˈe no te rahiraa ia haere mai. E titau manihini tatou i te feia e haapii ra i te Bibilia, e te tahi atu mau taata farii maitai. E tauaparau tatou e o ratou no nia i tei parauhia i te api 127 o te buka ra Te ite, paratarapha 18, no nia i te oroa te tia ia faatupuhia i te mau matahiti atoa.
4 E haafaufaa anaˈe i taua oroa faufaa roa ˈˈe ra o te matahiti 1997, ma te ite taatoa i te auraa o te poheraa o Iesu no tatou. Ia haere ïa tatou i taua ahiahi ra o te 23 no Mati, i reira te mau Kerisetiano mau na te ao atoa nei e faatupu ai ma te haapao maitai i te oroa Haamanaˈoraa.