Ia poro tatou i ta tatou tuhaa fenua taatoa
1 I roto i te mau tuhaa faaearaa taata, te vai atoa ra, i te tahi taime, te mau fare tapihooraa iti, mai te fare toa, te fare tamaaraa aore ra te fare hooraa tauihaa. Mai te peu e tei roto atoa teie mau fare tapihooraa i te tuhaa fenua, e tia ia tatou ia haere e hiˈo i te feia e rave ra i te ohipa i reira mai ta tatou e haere nei e hiˈo i te feia e faaea ra i teie nei vahi.
2 E nehenehe ta tatou e faaohipa i te hoê faaiteraa ohie e te poto, ma te parau atu ei hiˈoraa e: “Te hinaaro nei au e faaite ia oe i te hoê mea.” Mai te peu e te ite ra tatou e mea ohipa roa te fatu fare tapihooraa i tera taime, e nehenehe noa ˈtu tatou e pûpû i te hoê api parau iti e e parau atu e: “E hoˈi mai au ia vata anaˈe oe. Te hinaaro nei au e ite i to oe manaˈo no nia i teie api parau iti.”
3 Eiaha tatou e mǎtaˈu i teie huru pororaa. Ua farii te hoê taata poro e: “Te tiai noa ra vau e ia patoi mai te taata. Tera râ, ua maere roa vau i te mea e ua taa ê roa te ohipa i tupu i to ˈu faaiteraa ˈtu i te parau no nia i te Basileia. Mea maitai roa te taata e te auhoa; ua rave fatata te mau taata atoa i te mau vea.”
4 Ua ani te hoê vahine e rave ra i te ohipa i te hoê vahi hooraa fare e fenua, i te mau Ite ia haere mai i roto i ta ˈna piha ohipa. Ua farii oia i te mau vea e ua faaite oia i to ˈna hinaaro e haapii i te Bibilia. Ua faaitehia ˈtu te buka ra Te ite, e ua haamatahia ˈtura te haapiiraa i reira iho i roto i ta ˈna piha ohipa!
5 E hopoia na tatou te pororaa i ta tatou tuhaa fenua taatoa, oia hoi te auraa e farerei atoa i te feia tapihoo. (Ohi. 10:42) A faanaho i te haere atu e hiˈo ia ratou mai te tahi atu mau taata na te mau fare. Ia na reira tatou, eita noa ïa tatou e poro maitai aˈe i ta tatou tuhaa fenua, e fanaˈo atoa râ tatou i te mau faahopearaa oaoa o te faahoona i ta tatou mau tutavaraa.