Pahonoraa i ta outou mau uiraa

◼ Eaha te tia ia tatou ia haamanaˈo ia taio anaˈe tatou i te mau paratarapha i te mau putuputuraa?

Te rahiraa o te taime i faataahia no te haapiiraa o Te Pare Tiairaa e te haapiiraa buka, no te taio ïa i te mau paratarapha. Te auraa ra, e hopoia faufaa roa ta te taeae taio i te pae no te haapiiraa. E tia ia ˈna ia taio no te “faaite i te auraa” o te mau tumu parau e ia maramarama te feia e faaroo maira, e ia turai-atoa-hia ratou ia ohipa. (Neh. 8:8) No reira, e tia i te taeae taio ia faaineine maitai ia ˈna. (Tim. 1, 4:13; hiˈo te haapiiraa 6 o te Buka no te Haapiiraa.) Teie te tahi mau tuhaa faufaa roa no te taio maitai i mua i te taata.

Ia tano te tuuraa reo. A maiti na mua roa i te mau parau aore ra te mau pereota te tia ia faatomahia ia taa-maitai-hia te auraa.

A faahiti maitai i te mau parau. E tia ia faahiti maitai e ia haamatara maitai i te mau parau, ia taa i te feia e faaroo ra i te auraa o te mau parau e faaohipahia ra i roto i te mau buka e te mau vea. A imi i te mau taˈo o ta outou i ore i ite aore ra tei ore i matauhia, i roto i te titionare.

A paraparau ia faaroohia outou e ma te aau tae. Ia paraparau outou ma te reo puai e ma te aau tae, e faaara ïa outou i te anaanatae o te feia e faaroo ra, e haaputapû e e faaitoito atoa outou ia ratou.

A paraparau ma te mahanahana e mai tei matauhia i roto i te tauaparauraa. Na roto i te huru paraparau matauhia e ohie ai te parau. Ia faaineine oia ia ˈna iho e ia taio pinepine oia na nia iho, eita ïa te taeae taio e haamarirau, e mea anaanatae aˈe ta ˈna taioraa, e ere râ i te mea haumani e te fiu.—Hab. 2:2.

A taio i te mau mea atoa i papaihia. Mea pinepine, e taiohia te mau nota i raro i te api e tae noa ˈtu te mau parau i tuuhia i rotopu i te mau tapao paruru taa ê, ma te reo puai mai te peu e e haamaramarama te reira i te tumu parau. O te mau faahororaa anaˈe o te faataa ra e nohea mai te hoê manaˈo, te ore e taiohia. E tia ia taio i te nota i raro i te api, i te vahi i tapaohia i roto i te paratarapha e ia faaomuahia mai teie te huru: “Te na ô ra te nota i raro i te api e . . .” Ia oti te nota i te taiohia, a taio ïa i te toea o te paratarapha.

Ua riro te taio-maitai-raa i mua i te taata ei hoê o te mau ravea faufaa roa no ‘te haapii i te taata ia haapao i te mau mea atoa i parauhia mai’ e to tatou Orometua rahi.—Mat. 28:20.