E poro anaˈe i te Basileia
1 I roto i te Hebera 10:23, te faauehia ra tatou “ia papu maite to tatou mauraa i ta tatou parau,” aore ra tiaturiraa, i niuhia i nia i te Basileia o te Atua. Ua faaue Iesu e ia porohia te parau apî maitai o te Basileia na te mau fenua atoa. (Mar. 13:10) E mea faufaa roa ia haamanaˈo noa tatou i te reira, ia apiti anaˈe tatou i roto i te taviniraa.
2 Ia farerei tatou i te mau taata, e tamata tatou i te haamata i te hoê aparauraa i nia i te hoê tumu parau o te huti i to ratou anaanatae aore ra e tano no ratou. I te rahiraa o te taime, e faahiti tatou i te mau tumu parau o ta ratou i matau maitai, mai te ohipa ino e itehia ra i to tatou nei fenua, te mau fifi e farereihia ra e te ui apî, te haapeapearaa i te pae no te imiraa aore ra te toparaa i te pae faanavairaa faufaa. I te mea e ua mau te feruriraa o te rahiraa o te taata i nia i teie mau “peapea” o te oraraa, mea pinepine ratou i te faaite mai i to ratou tapitapiraa, ia faaite atu tatou e te anaanatae ra tatou ia ratou e te taa ra ia tatou i to ratou huru. (Luka 21:34) Mea na reira paha tatou e nehenehe ai e faaite atu i to tatou tiaturiraa.
3 Teie râ, mai te peu e eita tatou e haapao, e aparau noa tatou no nia i te mau manaˈo peapea e inaha, e moe-roa-hia ia tatou te tumu o to tatou tere: te pororaa i te poroi o te Basileia. Parau mau, e tano ia faataa ˈtu tatou i te taata i te mau tupuraa iino e faatupu nei i te mau haafifiraa e rave rahi, tera râ, ta tatou tapao, o te hutiraa ïa i to ratou ara-maite-raa i nia i te Basileia, te tiaturiraa hoê roa no te huitaata nei. Oia mau, e tiaturiraa faahiahia mau to tatou te tia i te taata ia ite. No reira, noa ˈtu e e haamata tatou i te faahiti i te tahi mau huru o te mau tau “ati rahi,” e tia ia faahaere oioi noa i te aparauraa i nia i te tumu mau o ta tatou poroi, “te evanelia e tia i te vairaa.” Ia na reira tatou, e rave faahope roa ïa tatou i ta tatou taviniraa.—Tim. 2, 3:1; 4:5; Apo. 14:6.