E paraparau anaˈe ma te mǎtaˈu ore
1 I te mau matahiti i mairi aˈenei, ua ite te feia poro i roto i te tahi mau fenua e mea fifi roa ia farerei i te mau taata i to ratou fare. I roto e rave rahi mau tuhaa fenua, peneiaˈe hoê taata i nia i te piti aita to te fare ia haere anaˈe atu tatou. E te faahopearaa, eita te rahiraa o te taime e horoahia ra e hotu mai.
2 Tau matahiti i teie nei, e farereihia na e rave rahi mau taata i te fare i te sabati, o tei faarirohia hoi e te pae rahi ei mahana faafaaearaa. Ua taui râ te mau peu. E mea matauhia ia rave te taata i te ohipa i taua mahana ra, aore ra ia haapao ratou i te mau hinaaro o te utuafare, mai te hoohoo haere, aore ra ia haere ratou e faaanaanatae ia ratou, e no reira, e faarue mai ratou i to ratou fare. E tae noa ˈtu i te sabati, ua riro te farereiraa i te mau taata i to ratou fare ei fifi.
3 Mai te peu e aore e taata i te fare, te auraa ra, tei te vahi ê ratou. I te mea e ta tatou tapao, o te paraparauraa ïa i te taata, no te aha tatou e ore ai e paraparau i te feia o ta tatou e farerei nei na te pae purumu, i te matete aore ra i ta tatou vahi raveraa ohipa. E peu matauhia na Paulo ia paraparau atu ‘i te feia o ta ˈna i farerei,’ no te faaite atu i te poroi. (Ohi. 17:17) E huru pororaa manuïa te reira i tera ra tau, e e huru pororaa manuïa atoa i teie nei tau.
4 Ia haere anaˈe tatou i tera fare e tera fare, te ite nei tatou i te mau taata e hahaere ra aore ra e faaea noa ra. I te mahana maitai, peneiaˈe e parahi ratou i te hoê vahi, aore ra e tatai aore ra e horoi ratou i to ratou pereoo uira. E navai noa paha ia ataata ˈtu tatou e ia aroha ˈtu tatou ma te auhoa no te haamata i te hoê aparauraa. Mai te peu e te faaea ra ratou i taua vahi ra, e nehenehe tatou e faahiti e aita tatou i farerei ia ratou i to ratou fare e i teie nei, te oaoa nei tatou i te paraparauraa ˈtu ia ratou. Na roto i to ratou faaitoitoraa i te paraparau, e rave rahi o tei haamauruuruhia no ta ratou mau tutavaraa.
5 E faatupu te mǎtaˈu ore i te mau faahopearaa maitatai: Ua faatia te hoê taeae e e paraparau o ˈna i te mau taata e tiai ra i te pereoo mataeinaa, e ori haere ra aore ra e parahi ra i roto i to ratou pereoo uira. Ma te mata ataata e te tuuraa reo auhoa, e rave oia mai te mea e e taata tapiri oia o te hahaere nei. I te na reiraraa, ua vaiiho o ˈna e rave rahi mau buka e ua haamata atoa o ˈna e rave rahi mau haapiiraa bibilia.
6 Te poro ra te hoê taeae e ta ˈna vahine i tera fare e tera fare, a farerei ai raua i te hoê vahine e amo ra i te hoê pute maa î maitai. Ua haamata ˈtura raua i te paraparau ia ˈna ma te haapopou ia ˈna no to ˈna itoito i te haapaoraa i to ˈna utuafare. I muri iho, ua ani atura raua: “Teie râ, na vai e haapao i te huitaata nei?” Ua faaara teie uiraa i te anaanatae o te vahine. I muri aˈe i teie aparauraa poto noa, ua titau manihini ihora oia ia raua i to ˈna fare e ua haamatahia ˈtura te hoê haapiiraa bibilia.
7 No reira, ia haere tatou e poro i tera fare e tera fare, noa ˈtu i te sabati aore ra i te tahi atu mahana o te hebedoma, e aore e taata i te fare, no te aha tatou e ore ai e faaitoito i te paraparau i te mau taata o ta tatou e farerei na te pae purumu aore ra i te tahi atu vahi? (Tes. 1, 2:2) E rahi atu ta tatou taviniraa i te hotu, e e fanaˈo tatou i te oaoa rahi aˈe i roto i ta tatou taviniraa.