Ia riro tatou ei feia rave, eiaha noa ei feia faaroo
1 I teie mahana, te haafaufaa nei te mau kerisetiano mau i te faaueraa e riro ei feia rave i te parau, eiaha noa ei feia faaroo. (Iak. 1:22) Mea taa ê roa to ratou haerea e to te feia e faahua parau nei e kerisetiano ratou, o te horoa noa nei i te hoê tusia vaha na te Atua. (Isa. 29:13) Ua faaite maitai Iesu e o te mau taata anaˈe tei rave i te hinaaro o te Atua o te ora mai.—Mat. 7:21.
2 Te hoê haamoriraa e aita e ohipa paieti, e mea faufaa ore ïa. (Iak. 2:26) No reira, e ani tatou ia tatou iho e: ‘Te haapapu ra anei ta ˈu mau ohipa e e faaroo mau to ˈu? Te ora ra anei au ma te taatoa ia au i te mau ohipa o ta ˈu e tiaturi ra? Nafea vau e nehenehe ai e apee maite â i te hiˈoraa o Iesu?’ E tauturu te mau pahonoraa haavare ore i teie mau uiraa ia tatou ia ite e eaha te haereraa i mua o ta tatou i rave e o te tia â ia rave faahou no te faatupu i te hinaaro o te Atua.
3 Ei mau pǐpǐ no Iesu, e tia ia tatou ia noaa i te hoê â tapao matamua mai tei faahitihia e te taata papai salamo: “Tei te Atua to matou nei faaahaaharaa e po noa ˈtu te mahana; e to oe te iˈoa ta matou e haamaitai e a muri noa ˈtu.” (Sal. 44:8) Ua riro te kerisetianoraa ei huru oraraa o te ohipa i te mau mahana tataitahi e i roto i te mau ohipa atoa o ta tatou e rave ra. E ite tatou i te faahiahia rahi ia haapapu tatou i roto i ta tatou mau ohipa atoa i to tatou hinaaro mau e arue ia Iehova.—Phil. 1:11.
4 E titau rahi atu â te arueraa ia Iehova i te oraraa maitai: Ahiri e o te hoê haerea maitai noa ta te Atua e titau ra, e nehenehe noa ïa tatou e haamaitai i to tatou huru taata. Teie râ, te titau atoa ra ta tatou haamoriraa i te faaiteraa i te mau maitai o Iehova e i te haamaitairaa i mua i te taata i to ˈna ra iˈoa.—Heb. 13:15; Pet. 1, 2:9.
5 Te pororaa o te parau apî maitai i mua i te taata, o te hoê ïa o te mau ohipa faufaa roa ˈˈe o ta tatou e rave. Ua pûpû taatoa Iesu ia ˈna i roto i teie ohipa, no te mea ua ite oia e ua riro te reira ei ora mure ore no te mau taata e faaroo mai. (Ioa. 17:3) I teie mahana, mea faufaa roa “te haapii hoi i te parau”; o te ravea otahi teie e nehenehe ai te mau taata e faaorahia. (Ohi. 6:4; Roma 10:13) Ma te ite i te rahi o te mau haamaitairaa, e nehenehe tatou e taa e no te aha Paulo i faaue ai ia tatou ia “faaite hua [tatou] i te parau” e ia “onoono maite â.”—Tim. 2, 4:2.
6 Eaha te faito o te tia ia horoahia i te arueraa ia Iehova i roto i to tatou oraraa? Ua parau te taata papai salamo e o ta ˈna ïa tapitapiraa te reira e po noa ˈtu te mahana. Eita anei teie atoa to tatou manaˈo? Oia. E faariro tatou i te mau tauaparauraa atoa ia vetahi ê mai te hoê taime faufaa roa no te aparau no nia i te iˈoa o Iehova. E imi tatou i te mau taime tano no te aratai i ta tatou aparauraa i nia i te mau ohipa i te pae varua. E tutava atoa tatou i te haere tamau i roto i te taviniraa e te amuiraa. E nehenehe te mau taata e vai ra te mau tupuraa au maitai, e feruri papu i te taviniraa pionie, o te tuu ra i te pororaa i nia i te parahiraa matamua i roto i to ratou oraraa i te mau mahana atoa. Te haapapu nei te Parau a te Atua ia tatou e te oaoa nei te feia e rave ra ma te itoito i te hinaaro o te Atua.—Iak. 1:25.