Te mau haamaitairaa o te Haapiiraa o te taviniraa teotaratia no 1996—Tuhaa 1
1 Ua taio anei outou i te mau faaueraa i roto i te “Porotarama 1996 no te Haapiiraa o te taviniraa teotaratia”? Ua tapao anei outou vetahi mau tauiraa? E niuhia te tumu parau no. 4 i nia i te buka Haaferuriraa ia au i te mau Papai (farani).
2 Te mau tumu parau e horoahia i te mau taata haapii: E horoahia te tumu parau no. 3 i te hoê tuahine. E niuhia te reira i nia i te vea iti “Tumu parau tauaparauraa Bibilia,” e e tia ia faatanohia te huru tupuraa i te pororaa na te mau fare aore ra o tei ore i faanahohia e te amuiraa.
3 Mai te peu e te huru tupuraa o te hoê ïa haapiiraa bibilia i te fare, e nehenehe na tuahine toopiti e parahi. A haamata roa ˈtu i te haapiiraa i muri iho i te tahi mau omuaraa parau poto, e i muri iho a uiui atu i te mau uiraa i neneihia. E tia ia hautihia te tiaraa o te fatu fare ma te huru mau. E nehenehe e imi e e taio i roto i te Bibilia i te mau irava i faataahia mai te peu e e taime. E tia i te tuahine o te hohora ra i te tumu parau ia faaohipa i te aravihi no te haapiiraa ma te turai i te fatu fare ia faaite mai i to ˈna mau manaˈo na roto i te tahi mau uiraa e ma te haaferuri i nia i te mau irava o tei faaitehia.
4 Eaha ïa te ohipa te tia ia ravehia mai te peu e e hau te mau irava i faataahia i roto i te tumu parau i te nehenehe e vauvauhia i roto e pae minuti te maoro? E maitihia ïa te mau irava tumu o te haafaufaa i te mau manaˈo matamua. Mai te peu e e mea iti te mau irava, e nehenehe e tuatapapa hau atu â i te mau manaˈo faufaa o te tuhaa e haapiihia ra. I te tahi mau taime, e nehenehe e taiohia te tahi paratarapha aore ra pereota i roto i te buka e e aparau atu ai i nia i te reira e te fatu fare.
5 E tia ia hohora i te tumu parau no. 4 ma te anaanatae e te ohie. Mai te peu e e haafaufaa tatou ma te taatoa i te faaineineraa horoahia i te Haapiiraa o te taviniraa teotaratia, e nehenehe hau atu â ïa tatou e “poro i te parau” ma te haamaitai atu â i te “aravihi no te haapiiraa.”—Tim. 2, 4:2, MN.