Ia haapao maite tatou i te parau no nia i te Basileia
1 I roto i te faahohoˈaraa no nia i te taata ueue, ua faataa Iesu e te huero o te mairi i nia i te “repo maitai” o te “taata i faaroo i te parau, e haapao maite atura i taua parau ra.” (Mat. 13:23.) I muri aˈe i to tatou faarooraa i te poroi no nia i te Basileia, ua ‘haapao maite anei tatou’? Eaha te mana o te reira i nia i to tatou oraraa? Ua tuu anei tatou na mua roa i te mau faufaa o te Basileia, ma te faaite e te haapao maite ra tatou i te poroi?
2 E mea faufaa te haapiiraa tataitahi no te taa maitai i te poroi o te Basileia. E tia ia tatou ia rave i te taime no te feruri hohonu i nia i te maa varua o te noaa ra ia tatou. Mai te peu e e taio vitiviti tatou i Te Pare Tiairaa, mai te huru ra e te horomii oioi ra tatou i te hoê maa au maitai e te atuatu i te ora. Te rave ra anei tatou i te taime no te amu ma te au i te maa i te pae varua? No te haafaufaa roa ˈˈe, e tia ia tatou ia titau i te itoito o te turai e te tamaa-maitai-raa i te pae varua. Mai te peu e aita, e nehenehe te tahi atu mau ohipa e faaiti mai i te mau haamaitairaa o te haapiiraa tataitahi aore ra e haafifi i te taime ta tatou e hinaaro no te haapii. E ere i te mea ohie ia apee i te hoê porotarama maitai o te haapiiraa. Parau mau e mea faufaa ia ara maitai ia aifaito noa ta tatou mau ohipa matamua, mea faahiahia roa ˈˈe râ te mau faufaa i te pae varua ta tatou e nehenehe e fanaˈo.—Mas. 3:13-18; Kol. 1:27.
3 Na roto i te tuatapaparaa i te mau Papai, e horoa tatou i te mau manaˈo maitatai e te faaitoito i te mau mahana atoa no nia i te Basileia. Te faanaho nei te feia e ‘taa ra i to ratou mau hinaaro i te pae varua’ ia ratou no te taio te tahi noa mau minuti i te mau mahana atoa i te irava o te mahana e to ˈna tatararaa (Mat. 5:3). Te rahiraa o te mau irava no nia ïa i te Basileia i roto i te mau tuhaa e rave rau. Ei hiˈoraa, tei roto te irava horoahia i te 22 no novema 1994 i te Mataio 13:4. Te parauhia ra i roto i te tatararaa no nia i te tiaturiraa o te Basileia e te faahaamanaˈo ra i te atâtaraa o te mau amuimuiraa iino e te feia tapiri aore ra e te mau fetii. I roto i te mau Betela atoa, ua faanahohia te hoê tuatapaparaa o te irava o te mahana e 15 minuti te maoro i te poipoi, i te mau mahana raveraa ohipa atoa. Te haapapu ra teie faanahoraa i te faufaaraa ia hiˈopoa i te taatoaraa o te irava e te mau haamaitairaa ta tatou e nehenehe e fanaˈo ia na reira tatou. I roto i ta ˈna tabula ohipa, te faanaho ra anei to oe utuafare i te hoê â aparauraa i te mau mahana atoa?
4 A rahi noa ˈi to tatou mauruuru no te Basileia, e hau atu â tatou i te turaihia ia faaite i to tatou taata-tupu i te poroi no nia i te reira. Te horoa mai nei Te Pare Tiairaa e te A ara mai na! i te mea ta tatou e nehenehe e pii te mori i te pae o te feruriraa, no te faaî i to tatou feruriraa i te mau haamaramaramaraa apî maitai. Auaa taua mau vea ra, te taa noa ra ia tatou i te faufaaraa o te Basileia o te Atua no te ao nei. Te tauturu ra te reira ia tatou ia riro ei mau taata i te pae varua o te atuatu ra i ‘te manaˈo o te Mesia.’ (Kor. 1, 2:15, 16.) E nehenehe ïa tatou e haapaari i to tatou faaroo e e faarahi i to tatou itoito e faaite i te tiaturiraa no nia i te Basileia.—Petero 1, 3:15.
5 E mea faufaa ia haapao maite tatou i te poroi o te Basileia. Ua riro te Basileia ei ravea ta te Atua e faaohipa no te haamau i to ˈna tiaraa mana arii, no te faaore i te ino e no te haamau i te hoê ao apî, te hoê paradaiso. Ua parau o Iesu ia tatou ia tuu i te Basileia i te parahiraa matamua i roto i to tatou oraraa. Mai te peu e te hinaaro nei tatou e ora i raro aˈe i ta ˈna faatereraa, e tia ia tatou ia riro ei mau melo mai te mau mamoe ra te huru (Mat. 6:10, 33). E rave anaˈe i te taime e pûpûhia maira ia tatou nei no te fanaˈo i te mau haamaitairaa ta te Basileia e ninii maira!