Te hinaaro ra te mau taurearea i te hoê hiˈoraa maitai
1 Te oaoa nei tatou i te iteraa i rotopu ia tatou e te rahi noa ˈtura te mau taurearea o te “haamaitai i te iˈoa o Iehova”. (Sal. 148:12, 13.) E mea apî roa e rave rahi. Te niuhia ra to ratou haereraa i mua, i roto i te hoê faito rahi, i nia i te faaineineraa e te hiˈoraa ta to ratou mau metua e horoa ra e te tahi atu mau melo paari aˈe o te amuiraa. Eiaha atoa râ e haafaufaa ore i te mana o te tahi atu feia apî, te mau taurearea paari aˈe e te feia apî feruriraa paari. Mai te peu e tei roto outou i teie huru faito matahiti, e nehenehe te mau faaararaa i muri nei e tauturu ia outou.
2 Te apee nei te mau tamarii i te hiˈoraa o te mau taurearea paari aˈe. Te hinaaro nei ratou e haamatau roa i te feia ta ratou e haafaahiahia nei. E faateitei ohie ratou i te tahi atu mau taurearea paari aˈe e mea ite e to mua aˈe ratou ia ratou. No reira, e apee paha ratou i ta outou huru paraparauraa e to outou haerea, e to outou tapea-maite-raa i te mau faufaa pae varua e to outou apitiraa i roto i te mau ohipa a te amuiraa.
3 Mai te peu e e taurearea paari aˈe outou, e haamaitairaa taa ê ta outou e te hoê hopoia rahi. I teie nei, e ohipa paha to outou hiˈoraa i nia i to outou mau hoa apî aˈe. A ani e: “Eaha to ˈu mana i nia i te mau tamarii apî aˈe? E mea haapao maitai anei au, ma te haapae i te ohipa maamaa e te mau ‘hinaaro [iino] o te apîraa ra’? Te faaroo ra e te auraro ra anei au i to ˈu nau metua, te mau matahiapo e te feia paari aˈe?” (Tim. 2, 2:22; Kol. 3:20). E tiaraa faufaa roa to ta outou mau parau e mau ohipa i nia i te haereraa i mua o to outou mau hoa apî aˈe o te hiˈopoa ra ia outou.
4 Te hopoia matamua a te amuiraa o te pororaa ïa i te poroi o te Basileia. E faaitoito to outou apiti-tamau-raa e te aau rotahi i roto i teie ohipa i to outou mau hoa ia rave hau atu â. Mai te peu e e nehenehe outou e rave i te taviniraa pionie tauturu, e turaihia to outou mau hoa ia na reira atoa. E nehenehe atoa outou e horoa i te hiˈoraa maitai ma te pahono i te mau putuputuraa e ma te pûpû i ta outou tauturu no te rave i te mau ohipa faufaa i te Piha no te Basileia.
5 Noa ˈtu e ere o Timoteo i te hoê taurearea faahou i to Paulo horoaraa ˈtu i te aˈoraa i muri nei, e nehenehe te mau taurearea e faaroo i te reira: “Ei haapaoraa râ oe na tei faaroo ra, i te parau, i te haerea, i te aroha, i te huru o te aau, i te faaroo, i te viivii ore.” (Tim. 1, 4:12). Mai te peu e te tavini nei outou ia Iehova ma te aau tae e ma to outou nephe atoa, te ohipa ra outou ma te maitai i nia i to outou mau hoa apî aˈe o te hiˈopoa ra ia outou e e tauturu outou ia ratou ia haere i mua ia riro ei feia paari e te maitai i te pae varua (Eph. 4:13). E haere mai paha te mau taurearea e, a tahi ra to ratou utuafare e haapii ai, i te parau mau na roto i ta ratou e ite ra i nia ia outou.
6 Te mea faufaa atu â, te haamaitai ra to outou hinaaro ru e itehia i te faahoperaa maitatai i nia ia Iehova e ta ˈna faanahonahoraa i to outou hinaaro-ru-raa e faaite i te mau huru maitai o te Atua. (Mas. 27:11). E maere te feia aau rotahi o te hiˈopoa ra ia outou i te taa-ê-raa rahi i rotopu ia outou e te mau taurearea o teie nei ao. Tei ia outou ra te hoê ohipa otahi roa: te tautururaa i to outou mau hoa apî aˈe ma te rave rahi atu â no te arue ia Iehova.—Sal. 71:17.