E faatupu tatou i te faaroo i roto i te Poiete o te taata
1 E manaˈo to te rahiraa o te mau taata i nia i te tumu o te ora. Ma te peapea râ, te aratai-hape-hia nei ratou e te farii ra i te pahonoraa horoahia na roto i te haapiiraa e mea tupu noa mai te mau mea atoa. Te tuatapapa ra te buka Poieteraa i te mau tuhaa iti o na uiraa e piti e te horoa ra i te mau haapapuraa teimaha no te turu i te Bibilia. Nafea ia tauturu i te mau taata aau rotahi e hinaaro ra e faaroo? Na roto i te mau hoˈi-faahou-raa e farerei. Ia hoˈi tatou, e mea maitai noa ia tapea mai i roto i te feruriraa i te hoê parau papu o te faatupu i te faaroo i roto i to tatou Poiete ra o Iehova.
2 Mai te peu e ua faaite te taata i to ˈna faaroo i roto i te Bibilia, e nehenehe ïa tatou e haamata i te tauaparauraa aravihi ma te parau e:
◼ “Te faahiti nei te Isaia 45:18 i te hoê parau puai no nia i te haamataraa o te ao o te reva atoa nei; te hinaaro nei au e ite i to oe manaˈo. [A taio e a vaiiho i te taata ia pahono.] Te faaite nei o Iehova ia ˈna iho mai te Poiete o te mau raˈi e te fenua. E no te ora ïa i nia i te fenua nei? Te faaite ra te Isaia 42:5 e no ǒ atoa mai ia ˈna ra. [Taio.] Mai te peu e e mea tano ta te Bibilia e parau ra, e mea hape ïa te haapiiraa e ua tupu noa mai te mau mea atoa. I to oe manaˈo, e nehenehe anei tatou e tiaturi i te Bibilia?” E rave mai tatou i te pene 17 o te buka Poieteraa, e haapapu tatou i te tahi atu mau tumu no te tiaturi e o Iehova te Poiete.
3 E nehenehe tatou e haamata i te tauaparauraa mai teie rii te huru:
◼ “I to ˈu haereraa mai, ua faahiti tâua i teie uiraa: Eaha te oraraa o te taata e o te fenua no a muri aˈe? A hiˈo na e nafea te buka ta ˈu i vaiiho mai e pahono i taua uiraa ra.” E huri tatou i te buka Poieteraa i te mau api 234-5 e e faaitoito tatou i te taata ia taio i te mau paratarapha 6 e 7. Mai te peu e te anaanatae faahou ra oia, e nehenehe tatou e parau e: “I to oe manaˈoraa, eaha te mau tauiraa maere mau e tupu i nia i te fenua nei?” Mai te peu e e nehenehe, e tauaparau ïa tatou i taua uiraa i te reira iho taime, aore ra i te hoê farereiraa i mua, ma te apee i te taioraa o te tahi atu mau paratarapha o taua pene ra o te buka Poieteraa.
4 Mai te peu e e anaanatae rii te taata i te haapaoraa, e nehenehe tatou e ani e:
◼ “Ua ite anei oe e rave rahi i teie nei o te tiaturi ra i te hoê puai e ere no te hoê taata aore ra tei faahohoˈahia i te hoê taata piihia te Natura Vahine? [A vaiiho i te taata ia pahono.] Aita te Bibilia e huna ra ia tatou i te ihotaata mau o te Atua.” A taio i te Apokalupo 4:11. I muri aˈe i te taioraa o te irava, e pahono paha te taata. E nehenehe ïa tatou e huti i muri iho i to ˈna ara-maite-raa i nia hoê aore ra e piti manaˈo papu o te pene 11 o te buka Poieteraa, e peneiaˈe e haapapu e te opuaraa a te Atua o te faariroraa ïa i te fenua nei ei paradaiso i raro aˈe i te aratairaa o te Basileia o te Mesia.
5 Te tahi atu ravea no te haamata i te hoê hoˈi-faahou-raa e farerei oia hoi:
◼ “Ua farerei te huitaata nei i te mau mauiui e te mihi rahi e te ino te tumu. Ua tǎpǔ te Poiete o te fenua ra o Iehova, e e faaorehia teie huru oraraa. [A huri i te buka i te api 196, e a taio i te Maseli 2:21, 22.] E nehenehe te feia e farii ra ia ˈna ei Tumu e ora ˈi ratou e o te rave nei i to ˈna hinaaro e fanaˈo i te mau haamaitairaa nehenehe mau.” Mai te peu e e mea tano, e tamau tatou i te aparauraa na roto i te tuatapaparaa i te Apokalupo 21:4, 5 i te mau api 197-8.
6 Ua ite te feia poro aravihi e mea maitai ia faanaho i te hoê taime no te rave i te mau hoˈi-faahou-raa e farerei. E tauturu te mau faanahoraa papu ia tatou ia atuatu oioi i te anaanatae. E hiˈo tatou eaha te taime tano roa no tatou e no te feia o te tuhaa fenua. Ma te apiti tamau i taua ohipa ra, e ite tatou i te oaoa ia rave tatou i te ohipa e ‘faariro i te mau taata ei mau pǐpǐ’.—Mat. 28:19, 20.