Te haaferuri ra anei tatou ia au i te mau Papai?
1 Te haere ra te hoê faehau ineine i te tamaˈi e te mauhaa e te parururaa mai te upoo tae atu i te avae. E afai te hoê tamuta aravihi o te faaineine ra e rave i te ohipa i nia i te hoê vahi paturaa rahi i te mau mauhaa ta ˈna e hinaaro no te faatupu i ta ˈna ohipa. E “ˈoˈe” ta te hoê tavini o Iehova e apiti ra i te taviniraa, i roto i te rima e e faaohipa oia ma te aravihi i te taime atoa e titauhia ra (Eph. 6:17). Hoê â huru atoa anei no tatou? Ia poro tatou, te vaiiho ra anei tatou i te Parau a te Atua ia paraparau ia haaputapû te varua moˈa i te mafatu o te feia e faaroo maira ia tatou? — Mas. 8:1, 6.
2 E ere te pororaa i te hoê ohipa ohie. I roto i te tahi mau tuhaa fenua, e mea varavara te mau taata i te fare, e pinepine te feia e tatara mai i te opani e rave rahi ohipa ta ratou, e mea iti roa ïa te mau taime no te haamata i te mau aparauraa bibilia hohonu. I te mea o te Bibilia ta tatou buka matamua, nafea ia faaohipa hau atu â i roto i te pororaa, e ia vaiiho i te poroi faauruahia ia ohipa i nia i te feia e faaroo ra?
3 I te mau taime atoa: Te hinaaro nei tatou e tatara i te Bibilia i te uputa atoa no te haaputapû i te taata e faaroo maira. E tia ia tatou ia faaineine ia tatou no taua tapao ra noa ˈtu eaha te buka ta tatou e pûpû ra. Mai te peu e te ru ra te taata e aita to tatou taime no te taio hoê aore ra e piti irava i roto i te Bibilia, no te aha e ore ai e faahiti aore ra e faataa i te hoê irava hou e pûpû atu ai i te hoê buka? E navai noa paha no te huti i to ˈna ara-maite-raa e no te aratai ia ˈna ia faaroo mai. — Heb. 4:12.
4 Ei hiˈoraa, mai te peu e e faaite tatou i roto i te A ara mai na! no te 8 no novema 1993 te tumu parau “Tei mua ta outou tamarii i te ati”, i muri aˈe i te hutiraa i te ara-maite-raa i nia i te api matamua, e faahiti tatou i teie uiraa: “E manaˈo anei outou e e nehenehe outou e paruru maitai ia ratou?” Noa ˈtu eaha te pahonoraa, e taio roa tatou i roto i te Bibilia aore ra e faataa i te hoê irava mai te Maseli 2:22 aore ra te Salamo 37:10, 11. I te na reiraraa, te vaiiho ra tatou te Parau a te Atua ia paraparau.
5 I roto i te mau hoˈi-faahou-raa e farerei: E tia ia faaineinehia te mau hoˈi-faahou-raa e farerei. Tera râ, e pinepine e tauaparau tatou i te mau tumu parau aita i faaineinehia e tatou. E mauhaa faahiahia roa te buka Haaferuriraa ia au i te mau Papai. Ma te faahiti aore ra ma te taio i te mau irava i roto i teie buka, e faaite tatou i te mau taata e mau tavini tatou no te Atua e ere râ i te feia hoo i te Parau. — Kor. 2, 2:17.
6 Mai te peu e aita tatou i tauaparau i te hoê tumu parau papu, e tatara noa ïa tatou i te buka Haaferuriraa i te hoê omuaraa parau tano, mai ia “Iesu Mesia”, “Mau mahana hopea” aore ra “Tia-faahou-raa”, e e faaohipa tatou i te hoê o te mau upoo parau iti no te haamata i te aparauraa. E titau manihini tatou i te mau taata ia taio i te tahi mau irava i roto i ta ratou iho Bibilia. No reira, e mea ora ïa te Parau a te Atua no ratou, e e ohipa te varua moˈa a Iehova mai te peu e farii mai ratou.
7 Te vai ra ia tatou te hoê hopoia faufaa roa: te pororaa i te parau apî e te faaararaa i te feia iino. E poroi na Iehova e ere râ na tatou. E vaiiho tatou i ta ˈna Parau, te ˈoˈe o te varua ia tauturu ia tatou.