E tauturu tatou i te feia e haapii ra i te Bibilia ia faaineine i ta ratou haapiiraa
1 Te faaite ra te feia o te faaineine nei i ta ratou haapiiraa o te Bibilia i te mau hebedoma atoa, e te anaanatae mau ra ratou i te haapiiraa, e i roto i te rahiraa o te tupuraa, e oioi ratou i te haere i mua i te pae varua i te feia aita e na reira ra. Aita paha te hoê taata e faaineine i ta ˈna haapiiraa no te mea aita o ˈna i ite e nafea. E tia paha ia faataa ia ˈna. Nafea ïa?
2 I te omuaraa, e rave rii tatou i te taime no te haapapu e ua taa i te taata haapii e te faaineineraa ia ˈna iho oia hoi te haapiiraa tataitahi ïa. Noa ˈtu e ua ite oia i te taio, aita e rave rahi taata i ite i te haapii. Te horoa ra te mau api 32-42 o te Buka no te Haapiiraa o te taviniraa teotaratia e rave rahi manaˈo faufaa ta tatou e nehenehe e horoa ˈtu i te taata haapii mai te peu e e titauhia.
3 E faaite tatou i te taata e mea faufaa ia haapii: E faaite paha tatou i te taata haapii i ta tatou buka haapiiraa e te mau parau e te mau pereota faufaa renihia. E faataa tatou ia ˈna e ma te hiˈo atu i te mea i renihia, e haamanaˈo ïa o ˈna i te mau manaˈo e e pahono oia na roto i ta ˈna iho mau parau. I reira, eita ïa o ˈna e pahono i te mau uiraa ma te taio noa i te mau tuhaa taatoa o te buka. Mai te peu e ua faaineinehia oia ma te tano i te haamataraa, e nehenehe ïa oia i muri iho, i te mau putuputuraa a te amuiraa, e horoa i te mau pahonoraa anaanatae. E faaite taua mau pahonoraa ra e te haafaufaa ra e te taa maitai ra ia ˈna te mau tumu parau haapiihia.
4 E haapii tatou ia ˈna ia faaohipa i te Bibilia: E tia ia faataa i te taata haapii ia imi i te mau irava o te mau Papai horoahia ei faahororaa i roto i te buka o te haapiiraa. Ia nehenehe oia e imi ma te ohie, e ite oia e te haapii mau ra o ˈna i te Bibilia. E parau mau, i roto i te taime matamua, e tia paha ia ˈna ia faaohipa i te tabula o te mau buka o te Bibilia i te haamataraa o te Bibilia. Tera râ, e tia ia faaitoito ia ˈna ia haamatau maitai i na 66 buka o te Bibilia. Ia imi oia e ia taio i te hoê irava bibilia, e tauturu tatou ia ˈna ia imi i te tuhaa o te haapapu ra i te manaˈo o te paratarapha, e eiaha râ ia faaatea ˈtu i te tumu parau ma te faaea noa i nia i te hoê tuhaa aita e tuati ra i te haapiiraa.
5 E faaitoito tatou i te taata haapii o te haere ra i mua ia taio i te Bibilia i roto i to ˈna taatoaraa. E onoono tatou i nia i te manaˈo e te Bibilia taatoa e Parau faauruahia mai e te Atua e e tia ia riro ei maa varua na te mau kerisetiano mau. — Mat. 4:4; Tim. 2, 3:16, 17.
6 E faahiti tatou i te tahi atu mau buka bibilia: Ia haere maitai te taata haapii i mua, e haamata o ˈna i te faaohipa i te tahi atu mau buka bibilia. Ma te haapao maitai, e faaitoito tatou ia ˈna ia imi i te mau haamaramaramaraa hau i roto i te mau buka a te Taiete ta ˈna i ite i to ˈna haereraa i te mau putuputuraa a te amuiraa. E faaite tatou ia ˈna e nafea ia faaohipa i te mau tahi mau tuhaa o te Tatararaa a te ao apî, ei hiˈoraa, o te ‘Faahororaa no te mau parau bibilia faufaa roa ˈˈe’ (farani). Ia haamata oia i te faatupu i ta ˈna iho vairaa buka teotaratia, e haapii tatou ia ˈna ia faaohipa i te buka Haaferuriraa ia au i te mau Papai, te mau Faahororaa e te mau Buka tauturu.
7 Mai te peu e e haapii tatou i te mau taata e haapii ra i te Bibilia e o tatou ia faaineine i ta ratou haapiiraa, e faariro tatou ia ratou ei feia haapii i te Bibilia aravihi o te tamau i te haere i mua i roto i te parau mau ia oti tatou i te haapii ia ratou i te Bibilia.