Te Pare Tiairaa — Te hoê maa varua i te hora mau ra
1 Ua fatata roa e 114 matahiti i teie nei, te aˈo nei Te Pare Tiairaa i to ˈna mau taata taio ia vai ara noa i te pae varua. Te haapaari nei o A ara mai na!, te tahi atu vea neneihia e te Taiete, i to tatou faaroo i te parau tǎpǔ a te Poiete no te haamau, i te tau o to tatou ui, i te hoê ao apî i reira e vai ai te hau e te ino ore. Ei mau mauhaa haapao maitai teie na vea e piti o te turama nei i to tatou eˈa i roto i te hoê ao poiri (Isa. 60:2). Eita roa ˈtu te parau mau o te Parau a te Atua e taui, tera râ te rahi noa maira to tatou maramarama a tamau noa ˈi Iehova i te faaohipa i taua mau mauhaa ra e te tahi atu no te horoa mai na tatou, i te pae varua, te “maa i te hora mau ra”. — Mat. 24:45; Mas. 4:18.
2 E faaohipa ma te maitai atu â i te mau vea: E faaite tatou i to tatou aau mehara no te mau haamaramaramaraa pae varua o ta tatou e fanaˈo ra ma te tauturu na roto i te aau tae i te mau taata ia taio i Te Pare Tiairaa e te A ara mai na! E rave rahi o te farii tamau nei i te mau vea, ma te papu maitai, o te oaoa ra i te taio atu. Tera râ, nafea ia faaara i te hoê anaanatae mau? Ia faaite tatou hoê aore ra e piti manaˈo o te hoê vea, te hoê api parau iti aore ra te hoê vea iti, e hiˈopoa tatou i te huru o te taata e faaroo ra ia tatou. Te faaroo maitai ra anei o ˈna? Te faatura ra anei o ˈna i te Bibilia e te apee ra anei oia i te taioraa o te mau irava bibilia? Te pahono ra anei o ˈna i te mau uiraa manaˈo? E titau anaˈe ia ˈna ia faaite mai i te mea o ta ˈna e anaanatae ra e ia ineine noa tatou i te faatano atu e ia taui i te tumu parau. E mea au aˈe paha na ˈna i te mau fifi utuafare, te mau fifi o te ohipa i te mau tumu parau i te pae faaroo.
3 Mai te peu e aita te taata e hinaaro ra e tamatahiti e farii râ o ˈna i te hoê vea aore ra i te tauaparau noa, e hoˈi faahou tatou e farerei ia ˈna hoê hebedoma i muri mai aore ra na mua ˈˈe, ia roaa faahou mai i te hoê aparauraa apî. Mai te peu e ua taio te taata i te mau vea o ta tatou i vaiiho atu e ua paraparau atu ma te au i te mau tumu parau pae varua, e ani tatou ia ˈna e e hinaaro anei o ˈna ia roaa mai ia ˈna ma te tamau i te mau vea e haamata ˈtu ai i te hoê eˈa opereraa vea.
4 E pûpû atu tatou i te hoê tamatahitiraa i te mau hoa ohipa, i te mau hoa haapiiraa e i te mau melo o to tatou utuafare. E faaite atoa tatou i te feia e rave nei i te ohipa e o tatou i roto i te pororaa faanaho-ore-hia e te amuiraa.
5 E tia ia horoahia te mau vea i te mau taata poro ia hopoihia ˈtu i roto i te amuiraa. Ia roaa mai ia tatou te hoê numera apî, ia matau maitai tatou i te taatoaraa o te vea. Teihea te mau tumu parau o te haamâha taa ê nei i te mau hinaaro o te mau taata o to tatou tuhaa fenua? Te hau e te ino ore i roto i te ao anei? Te faanavairaa faufaa anei? Te hoê faatereraa maitai anei? Te mea e haaati nei ia tatou anei? Te huti nei Te Pare Tiairaa i te ara-maite-raa o te mau taata i nia i te ravea otahi o te vai noa, te Basileia o te Atua (Dan. 2:44; Mat. 6:10). O te hoê ïa ô faahiahia mau a to tatou ‘Orometua rahi’. — Isa. 30:20.
6 E mea tano maitai te mau avaˈe eperera e me no te horoa hau atu â i te taime i te pororaa. I te mea hoi e te vai ra e pae hopea hebedoma i te avaˈe me, e rave rahi o te rave i te taviniraa pionie i taua avaˈe ra. E nehenehe tatou paatoa, i teie nei, e haamau i te mau tapao na tatou iho no te poro hau atu i roto i taua na avaˈe e piti ra, e e tauturu i te mau taata atoa ta tatou e farerei ia taio i Te Pare Tiairaa e te A ara mai na!