TUMU PARAU MATAMUA
O vai te mau Ite no Iehova?
“Ua matau vau ia Mike mea maoro i teie nei. E Ite no Iehova o ˈna. Ua huru ê noa râ vau i ta ˈna haapaoraa. O vai Iehova? No te aha eita te mau Ite no Iehova e faatupu i te mau oroa? Tei roto anei Mike i te tahi pǔpǔ iti faaroo?”—Becky, Kalifonia, Marite.
“I to te feia tapiri mai i to ˈu fare haamataraa i te haapii i te Bibilia e te mau Ite no Iehova, ua uiui au: ‘Eaha te auraa te iˈoa, Ite no Iehova? E iˈoa huru ê roa tera no te hoê haapaoraa!’”—Zenon, Ontario, Kanada.
“E ere mâua ta ˈu vahine i te feia haere i te fare pure. I to mâua manaˈo, tera te tumu i haere mai ai te mau Ite no Iehova. No mâua, eita tera pǔpǔ iti faaroo huru ê e nehenehe e haamâha i to mâua mau hinaaro. Mai tera atoa hoi no te tahi atu mau haapaoraa rahi.”—Kent, Washington, Marite.
“Aita vau i ite noa ˈˈe o vai ratou e eaha ta ratou mau tiaturiraa.”—Cecilie, Esbjerg, Danemata.
Ua ite paha oe ia ratou ia poro i tera e tera fare aore ra i te vahi taata. Ua horoa i te mau papai niuhia i nia i te Parau a te Atua e ua pûpû i te haapiiraa Bibilia tamoni ore. Na te tahi paha Ite no Iehova i horoa ˈtu i teie vea. E uiui noa râ oe, ‘O vai mau na te mau Ite no Iehova?’ Peneiaˈe hoê â manaˈo to oe e to te feia i faahitihia i nia ˈtu.
Mai te peu e uiraa ta oe mai tera e te haapeapea atoa ra, ihea e ite ai i te pahonoraa? E nafea ia ite eaha mau na te mau tiaturiraa a te mau Ite no Iehova? Na vai e aufau i te mau haamâuˈaraa o ta ratou ohipa pororaa e piha haamoriraa? No te aha ratou e haere ai i to fare e e farerei atoa ˈtu ai i te vahi taata?
Te na ô ra Cecilie, faahitihia i nia ˈtu: “Mea rahi ta ˈu i taio no nia i te mau Ite no Iehova i nia i te Internet. Ua faarooroo atoa vau te tahi mau parau e ua tiaturi i te reira. Tera te tumu mea au ore roa na ˈu te mau Ite no Iehova na mua ˈˈe.” I muri aˈe râ, ua ui tia roa ˈtu oia i te tahi Ite no Iehova e ua pahonohia ta ˈna mau uiraa.
E hinaaro anei oe e fanaˈo i te mau pahonoraa papu no nia i te mau Ite no Iehova? E faaitoito matou ia oe ia fariu i te feia tano roa ˈˈe ia ui, te mau Ite no Iehova, te feia i pia i teie vea. (Maseli 14:15) Te tiaturi nei matou e tauturu atu te mau tuhaa i muri nei ia ite o vai matou, eaha ta matou mau tiaturiraa e te tumu matou e poro ai.