E rave rahi te ora ˈtu i te hopea: Oe atoa anei?

Te faaara ra te Bibilia ia tatou e tupu te hoê haamouraa i te hopea: “E ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana . . . Ahiri hoi e haamaorohia taua tau ra, aore roa ïa e taata e ora.” (Mataio 24:21, 22) Te fafau ra te Atua e rave rahi taata te ora ˈtu, teie hoi ta ˈna i parau: “Te mou nei hoi teie nei ao . . . , o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:17.

Eaha te rave ia hinaaro oe ia ora ˈtu i te haamouraa o teie nei ao? E haaputu anei oe i te maa aore ra e faaineine anei i te tahi atu ohipa? Eita. Te faaitoito mai ra te Bibilia ia haapao i te mea faufaa aˈe. Te taio nei tatou: “E teie nei, e mou anaˈe taua mau mea atoa nei, mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra.” (Petero 2, 3:10-12) Ia au i te mau irava na mua ˈtu, o te mau faatereraa o teie nei ao ino e te feia e patoi i te aratairaa a te Atua “taua mau mea atoa nei” e haamouhia. E ere na te maa i haaputuhia e faaora ia tatou i tera haamouraa.

No te ora ˈtu, e tia ia tavini i te Atua ra o Iehova, ia faaite noa i te haerea maitai e ia rave i te mau mea ta ˈna e au ra. (Zephania 2:3) Eiaha e pee i te rahiraa o te ore e farii te ora nei tatou i te hoê tau taa ê. E tia ia haamanaˈo noa tatou ‘e tae mai taua mahana o te Atua ra.’ Maoti te Bibilia, e oaoa roa te mau Ite no Iehova i te faaite ia oe nafea ia ora ˈtu i tera mahana e fatata maira.