No te aha e haapii ai i te Bibilia?

Ua feruri aˈena anei oe i te mau uiraa mai tera te huru? Mai te peu e e, e ere oe anaˈe. Te uiui atoa ra te mau taata ati aˈe teie nei ao no nia i te mau uiraa faufaa o te oraraa. Te vai ra anei te mau pahonoraa?

E mirioni taata te parau, e, no te mea ua ite ratou i te mau pahonoraa papu i roto i te Bibilia. E hinaaro atoa anei oe e hiˈopoa i te reira? E farii paha ïa oe hoê haapiiraa Bibilia tamoni ore e te mau Ite no Iehova.a

Te vai ra iho â te parau: “Aita to ˈu e taime.” “Mea fifi roa ia taa.” “Aita vau e hinaaro ra”. Mea taa ê râ no te tahi atu. E farii hoi ratou i te haapii i te Bibilia. Teie te tahi mau hiˈoraa:

• “Ua haere au i te fare pureraa Katolika e Porotetani, te hiero a te tahi haapaoraa no Initia, te monahi no te feia e pee ra ia Bouddha e ua haapii atoa vau no nia i te mau haapaoraa i te haapiiraa teitei. Aita râ ta ˈu mau uiraa no nia i te Atua i pahonohia. I muri iho, ua farerei au hoê Ite no Iehova. Ua faahiahia vau, ua faaohipa hoi oia i te Parau a te Atua no te pahono mai e ua farii au i te haapii i te Bibilia.”—Gill no Beretane.

• “E rave rahi mau uiraa ta ˈu no nia i te oraraa, aita râ vau i mauruuru i te mau pahonoraa a to matou orometua. Area te tahi Ite no Iehova, ua faaohipa noa ïa i te Bibilia no te pahono mai. I to ˈna aniraa mai e hinaaro anei au e ite atu â, ua farii au ma te oaoa.”—Koffi no Bénin.

• “Ua hinaaro vau e ite eaha te tupu ia pohe te taata. I tiaturi na vau e nehenehe tei pohe e hamani ino i te feia e ora nei. Ua hinaaro râ vau e ite eaha ta te Bibilia e parau ra. Ua haamata ïa vau i te haapii e te tahi hoa Ite no Iehova.”—José no Beresilia.

• “Ua taio vau i te Bibilia, aita râ i taa noa ˈˈe. I muri iho, ua haere mai te tahi mau Ite no Iehova i to ˈu fare no te faataa maitai mai e rave rahi parau tohu Bibilia. Ua hinaaro vau e ite eaha ta ˈu e nehenehe e haapii atu â.”—Dennize no Mehiko.

• “Ua hinaaro vau e ite te tâuˈa mau ra anei te Atua ia ˈu e ua pure ïa ia ˈNa. I te mahana i muri iho, ua patoto mai te tahi mau Ite no Iehova i te opani e ua farii au i te tahi haapiiraa Bibilia.”—Anju no Népal.

Te haamanaˈo mai ra tera mau parau i ta Iesu i faahiti a na ô ai: “Ia ite ratou ia oe i te Atua mau ra.” (Ioane 17:3) Te vai ra tera hinaaro i roto i te taata atoa. O te Atua anaˈe te nehenehe e haamâha i te reira e ta ˈna ïa e rave ra maoti ta ˈna Parau, te Bibilia.

Teie nei, eaha te ravehia i te tahi haapiiraa Bibilia? E nafea oe ia faufaahia? E pahonohia tera na uiraa i te tumu parau i muri nei.