E nafea ia haamanaˈo i te pohe o Iesu?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. E nafea ia haamanaˈo i te pohe o Iesu?

Ua parau Iesu i ta ˈna mau pǐpǐ ia haamanaˈo i to ˈna pohe maoti te hoê amuraa maa taipe ma te faaohipa i te pane e te uaina. Te faahohoˈa ra te pane i te tino o Iesu e te uaina i to ˈna toto.—A taio i te Luka 22:19, 20.

Ua faaohipa Iesu i te pane hopue ore. I roto i te Bibilia, e faaohipa-pinepine-hia te hopue no te faahohoˈa i te hara. E taipe tano maitai ïa te pane o te tino tia roa o Iesu. Ua horoa o ˈna i to ˈna tino ei tusia. Ua mono te reira i te mau tusia animara ravehia i raro aˈe i te Ture a Mose. (Hebera 10:5, 9, 10) E taipe te uaina o te toto taoˈa rahi o Iesu, tei haamaniihia ei tusia no ta tatou mau hara.—A taio i te Petero 1, 1:19; 2:24; 3:18.

2. Afea e haamanaˈo ai i to ˈna pohe?

Ua pohe Iesu i te 14 no Nisana, i te oroa Pasa. No te mau ati Iuda, e haamata te mahana i te toparaa mahana. I te po hou oia a pohe ai, ua amu Iesu i te Pasa e ta ˈna mau aposetolo. E ua haamau atura i te hoê oroa apî no te haamanaˈo i to ˈna pohe.—A taio i te Luka 22:14, 15.

I teie mahana, e haamanaˈo te nunaa o te Atua i ta ˈna i faanaho na roto ia Iesu no te faatiamâ i te ao taatoa nei i te hara e te pohe. (Exodo 12:5-7, 13, 17) I faatupuhia na te Pasa hoê taime i te matahiti. Oia atoa no te Oroa haamanaˈoraa i te poheraa o Iesu, hoê taime i te matahiti i muri aˈe i te toparaa mahana o te 14 no Nisana ia au i te tarena avaˈe o te Bibilia.—A taio i te Ioane 1:29.

3. O vai te amu i te pane e te inu i te uaina?

A horoa ˈi i te uaina i ta ˈna mau pǐpǐ, ua parau Iesu: “Teie nei auˈa, o te faufaa apî ïa.” (Korinetia 1, 11:25) Ua mono te faufaa apî i te faufaa o te Ture a Mose, i reira hoi to te Atua fafauraa i te mau Iseraela e ia faaroo mau ratou ia ˈna, e riro ratou ei nunaa no ˈna. (Exodo 19:5, 6) I te mea e aita ratou i faaroo i to te Atua reo, ua haamau Iehova i te hoê faufaa apî.—A taio i te Ieremia 31:31.

Na roto i te faufaa apî e haamaitai ai Iehova i te taata e rave rahi. Mea iti te taata tei ô i roto i teie faufaa, 144 000 noa ratou. Na roto ia ratou, e fanaˈo e mirioni taata o te mau nunaa atoa i te ora mure ore i roto i te paradaiso i te fenua. Te tavini nei vetahi, tei ô i roto i te faufaa apî, i te Atua i nia i te fenua. O ratou anaˈe te amu i te pane e te inu i te uaina, ia ratou ra hoi Iehova i te faaauraa i te faufaa apî tei haamanahia e te toto o Iesu.—A taio i te Luka 12:32; Apokalupo 14:1, 3.

4. E nafea tatou e faufaahia ˈi i te Oroa haamanaˈoraa?

E faarahi te Oroa haamanaˈoraa i te poheraa o Iesu i te mau matahiti atoa i to tatou mauruuru no te here faahiahia mau o Iehova. Ua tono mai oia i ta ˈna Tamaiti ia pohe o ˈna no ta tatou mau hara. Ia haere tatou i te Oroa haamanaˈoraa, e feruri anaˈe ïa i te auraa o te pohe o Iesu no tatou e e nafea ia faaite i to tatou mauruuru no ta Iehova e Iesu i rave no tatou.—A taio i te Ioane 3:16; Korinetia 2, 5:14, 15.

No te faahohonu atu â, a hiˈo i te mau api 206-208 o teie buka, Eaha ta te Bibilia e haapii mau ra?, piahia e te mau Ite no Iehova.