O vai te tumu o te ino?

NO TE mau ohipa riaria i tupu i Rwanda i te matahiti 1994, ua parau te tomana o te nuu a te Nunaa amui e ua ite mata roa oia i te Diabolo ei auraa parau. Aita i mau ia ratou te taparahiraa taata i taua fenua ra. Ua parau atoa te tahi atu tane e te taata aita e tiaturi ra e te vai ra Satani, ia haere ïa e hiˈo i te hoê tiapai apoo tino pohe i Rwanda. O te Diabolo iho â anei te tumu o taua mau ohipa riaria ra?

No te rahiraa o te taata, e ere te hoê varua ino itea ore te tumu o te haavîraa uˈana e te aroha ore. O te ino râ o te taata e to ˈna mau hinaaro miimii. No vetahi, te faaohipa ra te hoê pǔpǔ ona huna i to ratou mana i nia i te taata ahia ˈtura matahiti no te faatere i te ao taatoa. E no te tahi atu, o te mau faatereraa e to ratou mau tia te tumu o te mau ohipa tano ore atoa e te mauiui e itehia ra.

E oe, eaha to oe manaˈo? No te aha i rahi roa ˈi te ino, te aroha ore, te ohipa riaria, e te mauiui i te ao nei i teie mahana noa ˈtu te mau tutavaraa i te faaore i te reira? No te aha te taata e tâuˈa ore ai i te faahopearaa o ta ratou mau ohipa, a mou hoi te huitaata? O vai te tumu o te ino? Na vai hoi e faatere ra i te ao nei? E maere paha oe i te pahonoraa.