E tau maitai aˈe to mua noa mai!

“No parahirahi aˈe te paieti ore, e aita ra . . . Area te feia mǎrû ra, e parahi ïa i te fenua, e oaoa ratou i te rahi o te hau.”—SALAMO 37:10, 11.

TE HINAARO ra anei oe e ite i te tupuraa o te parau tohu i nia nei? E ore ai! E tumu papu no te tiaturi e fatata te reira i te tupu.

E tuhaa iti noa to na mua ˈtu mau tumu parau o te mau parau tohu Bibilia o te faaite maitai ra e te ora nei tatou i te “anotau hopea.” (Timoteo 2, 3:1-5) Ua turai te Atua i te mau taata papai Bibilia ia tohu i tera mau tupuraa ia noaa ia tatou te tiaturiraa. (Roma 15:4) Te haapapu ra te tupuraa o te reira e ua fatata te mau ati ta tatou e ite ra i te ore.

Eaha ïa to muri iho? E faatere mai te Basileia o te Atua i te taata atoa. (Mataio 6:9, 10) Teie te faataaraa Bibilia o te huru oraraa i nia i te fenua i taua taime ra:

● E faaorehia te oˈe. “E riro hoi e maa sitona tei te fenua i nia i te tupuai o te mau mouˈa.”—Salamo 72:16.

● Aita e maˈi faahou. “E ore hoi to reira e parau e, Ua paruparu vau i te maˈi.”—Isaia 33:24.

● E ruperupe te fenua. “E rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare.”—Isaia 35:1.

Teie noa te tahi mau parau tohu Bibilia faaitoito o te fatata i te tupu. No te aha e ore ai e ani i te mau Ite no Iehova ia faaite ia oe no te aha ratou e tiaturi ai e e tau maitai aˈe to mua noa mai?