Ua ite anei outou?

Eaha ta te aposetolo Paulo i faahiti ia ˈna i parau e te vai nei “te mau tapao a te Fatu ra a Iesu” i nia i to ˈna tino?—Galatia 6:17.

▪ Ua rau te pahonoraa a te amuiraa o te senekele matamua i ta Paulo parau. I tahito ra ei hiˈoraa, e tapaohia te tino o te feia haruhia i te tamaˈi, te eiâ i te hiero, e te mau tîtî horo ê i te auri faaahuhia. Mea haama roa no te taata ia tapaohia ratou.

E ere râ te reira i te mea haama no te tahi mau taata. I tahito ra, ua na reira e rave rahi no te faaite e e melo ratou no te hoê opu fetii aore ra haapaoraa taa ê. Ei hiˈoraa, ia au i te hoê buka (Theological Dictionary of the New Testament), “i pûpû na to Arama ia ratou i te atua [o te vero] Hadad e i te ruahine [iˈa] Atargatis ma te tapao i to ratou tuatiraa rima aore ra aˈî . . . E rauere te tapaohia i nia i te feia haamori ia Dionysos” atua o te uaina.

Te manaˈo ra e rave rahi taata tatara parau i teie tau e te faahiti ra Paulo i te mau rifa i to ˈna hamani-ino-raahia a tavini ai oia ei mitionare. (Korinetia 2, 11:23-27) Peneiaˈe râ te manaˈo ra Paulo i to ˈna huru oraraa e faataa ra ia ˈna ei Kerisetiano, eiaha râ i te mau rifa i nia i to ˈna tino.

Ua riro anei te mau oire haapuraa i Iseraela i tahito ei vahi tapuniraa no te feia ohipa ino?

▪ I roto i te mau nunaa etene i tahito ra, ua riro e rave rahi hiero ei vahi tapuniraa no te feia horo ê aore ra ohipa ino. Oia atoa te mau fare monahi e fare pure a te Amuiraa faaroo Kerisetiano i muri aˈe. Aita râ te mau oire haapuraa i Iseraela i tahito i riro ei vahi tapuniraa no te feia ohipa ino, ia au i te mau ture i haamauhia.

Ia au i te Ture a Mose, e paruru te mau oire haapuraa i te taparahi taata opua ore. (Deuteronomi 19:4, 5) E nehenehe oia e horo i te oire haapuraa piri roa ˈˈe, ia ore oia e noaa i te fetii tane piri roa o tei taparahihia, o te tahoo i te toto tei manii. I reira, e faataa oia i tei tupu i te mau matahiapo, e e afaihia oia no te haavaraa i te oire i tupu ai te ati pohe. E nehenehe ïa oia e haapapu i to ˈna hapa ore. E hiˈo faahou te mau matahiapo i te taairaa o te taata horo ê e tei pohe ia ˈna, no te ite e aita anei oia i riri na ia ˈna.—Numera 35:20-24; Deuteronomi 19:6, 7; Iosua 20:4, 5.

Aita anaˈe ta ˈna e hapa, e hoˈi oia i te oire haapuraa, a faaea noa ˈi i reira e na pihai iho mai. E ere teie mau oire i te fare tapearaa. E rave te taata e haapu i reira i te ohipa ei melo faufaa o te oire. Ia pohe te tahuˈa rahi e nehenehe ai te feia horo ê atoa e faarue i te mau oire haapuraa ma te hau.—Numera 35:6, 25-28.

[Hohoˈa fenua i te api 9]

(Hiˈo i te papai)

OIRE HAAPURAA

1 KEDESA

2 GOLANA

3 RAMOTA-GILEADA

4 SEKEMA

5 BEZERA

6 HEBERONA

Ioridana