Ravea 1

A here i te taata, eiaha e nounou i te moni e te taoˈa

EAHA TA TE BIBILIA E HAAPII RA? “O te nounou moni . . . te tumu o te mau ino atoa nei.”—Timoteo 1, 6:10.

EAHA TE FIFI? Te onoono ra te feia tiani eiaha ia mauruuru i ta tatou e fanaˈo ra. Te hinaaro ra ratou ia ohipa ˈtu â tatou ia noaa mai te moni no te hoo i te mau taoˈa apî aˈe, maitai aˈe, e rahi aˈe. E faahema te moni, oioi tatou i te vare. Te faaara ra râ te Bibilia e eita roa ˈtu te hoê taata e nounou ra i te moni e mauruuru. “O tei nounou i te ario ra, e ore ïa e mauruuru i te ario; e tei nounou i te taoˈa ra, e ore ïa e mauruuru i te taoˈa e ia rahi noa ˈtu,” ta te arii Solomona i papai.—Koheleta 5:10.

EAHA TE RAVE? A pee i te hiˈoraa o Iesu e a haapii i te here atu â i te taata eiaha i te taoˈa. No to ˈna here i te taata, ua horoa Iesu i tei tia ia ˈna, i to ˈna ora atoa. (Ioane 15:13) Ua parau oia: “E mea maitai i te horoa ˈtu i te rave mai.” (Ohipa 20:35) Ia matau tatou i te horoa i to tatou taime e taoˈa no vetahi ê, e na reira atoa mai te taata. Ua na ô Iesu, “E horoa, e e noaa hoi ta outou.” (Luka 6:38) E haamauiui te feia e nounou ra i te moni e te taoˈa ia ratou iho. (Timoteo 1, 6:9, 10) E itehia râ te mauruuru mau ia here tatou ia vetahi ê e ia herehia mai tatou e ratou.

No te aha e ore ai e hiˈopoa i to oe oraraa no te faaohie atu â? E nehenehe anei oe e faaiti mai i ta oe mau taoˈa aore ra i ta oe e hinaaro e hoo mai? Ia na reira oe, e taime e e puai â to oe no te mau mea faufaa roa o te oraraa, mai te tautururaa i te taata e te taviniraa i te Atua, o tei horoa mai i ta oe mau mea atoa.

[Hohoˈa i te api 4]

“E horoa, e e noaa hoi ta outou”