Ta Iesu e haapii maira

No nia i “te hopea”

Te hopea o te aha?

Ua ui te mau pǐpǐ ia Iesu: “[Eaha] te tapao o to oe taeraa mai e te hopea o teie nei ao?” (Mataio 24:3) I to ˈna pahonoraa i taua uiraa ra, aita Iesu i parau e o te paraneta fenua te mou. Na mua ˈtu, ua faahiti oia i te parau “teie nei ao” no te faataa i te faanahoraa taatoa i te pae faaroo, tapihoo e poritita faaterehia e Satani. (Mataio 13:22, 40, 49) O tera ïa ao ta ˈna e manaˈo ra ia ˈna i parau: “O te hopea ihora ïa.”—Mataio 24:14.

Mea nafea to Iesu faataaraa i te hopea?

E “evanelia” te hopea o teie nei ao parau-tia ore. Ua parau Iesu: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” Ua faataa Iesu i te hopea o te ao e vai nei mai teie: “E ati rahi . . . tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu. Ahiri hoi e haamaorohia taua tau ra, aore roa ïa e taata e ora.”—Mataio 24:14, 21, 22.

O vai te haamouhia?

O te feia anaˈe aita e here ra e aita e tavini ra ia Iehova e ia Iesu te haamouhia. Aita tera mau huru taata e faaroo ra i te Atua. Ua parau Iesu: “Mai tei te anotau ra ia Noa ra, oia atoa te haerea mai o te Tamaiti a te taata nei. Mai tei te anotau i mua iho i te diluvi ra, . . . aore roa i ite, e roohia noa ihora ratou e te diluvi, pau roa ˈtura ratou.” (Mataio 24:36-39) Ia au ia Iesu, mea rahi tei nia i te eˈa e tae atu ai i te pohe. Ua haapapu râ oia e te vai ra te ‘eˈa piri e tae atu ai i te ora.’—Mataio 7:13, 14.

Afea teie nei ao e mou ai?

I te aniraahia ia ˈna te tapao o to ˈna vairaa mai “e te hopea o teie nei ao,” ua pahono Iesu: “E tia mai . . . te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi, . . . e e aueue fenua . . . e no te mea e rahi te ino i te tupuraa, e riro te rahi o te taata i te iti te hinaaro.” (Mataio 24:3-12) No reira, e auraa faaitoito to te mau parau apî peapea atoa i teie tau, ua fatata ïa te faatereraa a te Basileia o te Atua i te hopoi mai i te hau na te feia faaroo. Ua parau Iesu: “Ia hiˈo outou i taua mau mea nei i te tupuraa, ua fatata ïa te basileia o te Atua, ia ite hoi outou.”—Luka 21:31.

E mea maitai ia aha oe?

Ua parau Iesu e ua “horoa mai” te Atua “i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) No te faahotu i te faaroo i te Atua e i ta ˈna Tamaiti, e titauhia ia ite maitai oe ia raua. No reira Iesu i parau ai: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

A ara ia ore te mau tapitapi e te mau fifi ia tapea ia oe eiaha e haapii e nafea ia faaite i to oe here i te Atua. Ua parau Iesu: “E ara . . . ia outou, o te teimaha outou i . . . te peapea o teie nei ao, a roohia mai ai outou e taua mahana ra aore i manaˈohia. E roohia mai hoi to te ao atoa nei i te reira mai te marei ra.” Ia pee oe i te faaararaa a Iesu, ‘e au ïa ia oe te ora i teie nei mau mea iino e fatata mai nei.’—Luka 21:34-36.

Ei haamaramaramaraa hau, a hiˈo i te pene 9, “Te ora ra anei tatou i te ‘anotau hopea’?” o te buka Eaha ta te Bibilia e haapii mau ra?a

[Nota i raro i te api]