Uiraa a te feia taio

O te Atua anei te tumu o te mau faaoraraa maˈi semeio atoa?

Aita e feaaraa e e mana to te Atua ra o Iehova no te faaora i te maˈi. Aita atoa e feaaraa e e nehenehe oia e horoa i tera mana i to ˈna feia haamori. Ei hiˈoraa, i te tau o te mau aposetolo, hoê o te mau ô taa ê a to ˈna varua moˈa, o te faaoraraa maˈi semeio ïa. Ua papai te aposetolo Paulo: ‘Ua horoahia ta te varua faaite i te taata atoa, ia maitai paatoa. I horoahia mai te parau paari e te varua, i te hoê ra; ta te tahi ra, o te ite ïa i te faaora maˈi na taua varua ra; ta te tahi ra, o te tohu ïa; ta te tahi ra, o te parau ěê ïa.’—Korinetia 1, 12:4-11.

Teie râ, ua papai atoa Paulo i roto i tauâ rata ra i to Korinetia e e faaorehia te mau ô semeio a te varua moˈa o te Atua ra. Ua parau oia e: “Area te mau tohu ra, e mou ïa; area te parau ěê ra, e ore atoa ïa; area te ite ra, e faaorehia ïa te reira.”—Korinetia 1, 13:8.

I te senekele matamua, i ravehia na te mau faaoraraa maˈi semeio e Iesu Mesia e ta ˈna mau aposetolo. I te taime a haamata ˈi te amuiraa Kerisetiano, te tumu o te mau ô a te varua, oia atoa te neheneheraa e rave i te mau faaoraraa maˈi, no te faahanahana ïa i te Atua e e tapao te reira no ta Iehova farii maitai e haamaitairaa i te amuiraa Kerisetiano haamau-apî-hia. A paari mai ai aore ra a mau papu roa ˈi râ te amuiraa Kerisetiano, ua titauhia ia faaite oia i to ˈna faaroo aueue ore, to ˈna tiaturiraa, e to ˈna here ei haapapuraa i ta te Atua farii maitai, eita râ oia e tuu i te tapao i nia i te mau ô taa ê. (Ioane 13:35; Korinetia 1, 13:13) No reira, i te area matahiti 100 o to tatou tau, ua ore te mau faaoraraa maˈi semeio tei haapapu na i ta te Atua farii maitai.a

E nehenehe râ paha oe e uiui, ‘No te aha vau e faaroo noa ˈi i te mau faatiaraa o te mau rapaauraa maˈi semeio?’ Ei hiˈoraa, ua faatia te hoê vea no te hoê taata o tei parauhia e e mariri ai taata to ˈna. E oru to ˈna i nia i to ˈna upoo, i nia i to ˈna mau mape, e tae roa ˈtu i roto roa i to ˈna mau ivi. Mea huru ahoaho to ˈna a muri aˈe e tae roa ˈtu i te mahana i “paraparau” ai te Atua e o ˈna. Tau mahana i muri aˈe, ua pee to ˈna mariri ai taata, ta te faatiaraa ïa e faaite ra.

Ia faaroo outou i tera huru faatiaraa, no te aha e ore ai e uiui ia oe iho: ‘E mea mau anei teie faatiaraa? Te vai ra anei te haapapuraa faataa-maitai-hia a te taote no te turu i ta tera taata e parau ra? E noa ˈtu e e faaoraraa maˈi paha te reira ia hiˈohia, te haapii ra anei te Bibilia e o te Atua te tumu o te mau tupuraa atoa e au i te faaoraraa maˈi semeio?’

E faufaaraa taa ê to te pahonoraa i tera uiraa hopea. Ua faaara Iesu i ta ˈna mau pǐpǐ: “E ara . . . i te orometua haavare . . . E rave rahi te parau mai ia ˈu ia tae i taua mahana ra, E te Fatu, e te Fatu, e ere anei ua haapii matou ma to oe iˈoa, e ua tatai i te mau demoni i to oe iˈoa, e ua rave i te semeio e rave rahi i to oe iˈoa? O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”—Mataio 7:15, 21-23.

Papu maitai, no ǒ mai i te tahi tumu ê atu i te Atua te mea e parauhia ra e faaoraraa maˈi semeio. Ia ore tatou ia haavarehia e te feia e parau ra te faatupu ra ratou i te semeio i te iˈoa o te Atua, e mea hinaarohia ia noaa ia tatou te ite mau i te Atua, ia faaohipa i to tatou puai haaferuriraa horoahia mai e te Atua, e ia haapii e nafea ia ite i te feia e rave ra i to ˈna hinaaro.—Mataio 7:16-19; Ioane 17:3; Roma 12:1, 2.

[Nota i raro i te api]