Te tâuˈa ra anei te Atua ia ˈu?

Pahonoraa matauhia:

▪ “E Atua faufaa roa ino o ˈna no te haapao mai i to ˈu mau fifi.”

▪ “I to ˈu manaˈo, aita o ˈna e tâuˈa ra ia ˈu.”

Eaha ta Iesu i parau?

▪ “E ere anei taipae manu rii i hoohia i na asario e piti nei? e aita te hoê i taua na manu ra i moe i te Atua. E ua hope atoa te rouru o to outou mau upoo na i te taiohia. Eiaha hoi outou e mǎtaˈu; e rahi to outou maitai i to te manu.” (Luka 12:6, 7) Aita e feaaraa, ua haapii Iesu e te tâuˈa ra te Atua ia tatou.

▪ “Eiaha outou e tapitapi noa, a na ô ai ra, Eaha ta matou ia amu? e, Eaha ta matou ia inu? e Eaha to matou ahu ia ahu? (Te imi nei hoi te mau Etene i taua mau mea atoa nei:) ua ite hoi to outou Metua i te ao ra, e ia noaa taua mau mea ra ia outou e tia ˈi.” (Mataio 6:31, 32) Ua papu ia Iesu e ua ite te Atua i to tatou iho mau hinaaro.

TE HAAPAPU roa ra te Bibilia e te tâuˈa ra te Atua ia tatou. (Salamo 55:22; Petero 1, 5:7) Mai te peu e e, no te aha ïa tatou e faaruru ai i te mauiui rahi i teie tau? Mai te peu e e Atua î i te here oia e te mana hope, no te aha o ˈna e ore ai e rave i te tahi mea no te faaore i te mauiui?

Ua taaihia te pahonoraa i te hoê mea aita e rave rahi i ite—o Satani te Diabolo te faatere o teie nei ao ino. I to ˈna faahemaraa ia Iesu, ua pûpû atu Satani i te mau basileia atoa o te ao, ma te parau e: “E horoa ˈtu vau i te hau, e te hinuhinu i teie nei mau fenua ia oe, ua pûpûhia mai hoi teie ia ˈu, e na ˈu e horoa ˈtu na ta ˈu taata i hinaaro.”—Luka 4:5-7.

Na vai i faariro ia Satani ei faatere i te ao? I to Adamu raua Eva, to tatou na metua matamua, faarooraa ia Satani e huriraa i te tua i te Atua, ua maiti raua ia Satani ei faatere no raua. Mai taua orureraa hau ra, ua vaiiho te Atua ra o Iehova ma te faaoromai i te taime no te faaite i te pau rahi o ta Satani faatereraa. Aita Iehova i faahepo i te taata ia tavini ia ˈna, ua horoa mai râ oia i te ravea no te fariu ia ˈna ra.—Roma 5:10.

No te mea te tâuˈa ra te Atua ia tatou, ua rave oia i te mau faanahoraa ia faatiamâ Iesu ia tatou i te faatereraa a Satani. E fatata roa Iesu i te “faaere atu ia ˈna no ˈna te pohe nei, oia hoi te diabolo ra.” (Hebera 2:14) Mea na reira oia e “haamou [ai] i te ohipa a te diabolo ra.”—Ioane 1, 3:8.

E haamau-faahou-hia te paradaiso i nia i teie fenua. I reira, “na te Atua e horoi i to [te taata] roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:4, 5.a

[Nota i raro i te api]

[Parau iti faaôhia i te api 8]

E haamau-faahou-hia te paradaiso i nia i teie fenua