O Iesu anei te Atua Manahope?
Pahonoraa matauhia:
▪ “E, o te Atua Manahope o Iesu.”
▪ “O Iesu, o te Atua ïa tei riro ei taata.”
Eaha ta Iesu i parau?
▪ “Ahiri outou i hinaaro mai ia ˈu, e oaoa ïa outou o vau e haere tia i te Metua ra; e rahi hoi tau Metua ia ˈu.” (Ioane 14:28) Ua ite Iesu e aita o ˈna e to ˈna Metua i faito.
▪ “Te haere nei au i tau Metua ra e to outou Metua ra, e i tau Atua ra e to outou Atua ra.” (Ioane 20:17) Aita Iesu i parau e o ˈna te Atua, e Ihotaata ê râ te Atua.
▪ “E ere . . . i ta ˈu iho te parau ta ˈu i parau atu na, na te Metua râ i tono mai ia ˈu nei ra i faaue mai ia ˈu i te parau ia parau vau e ia haapii au.” (Ioane 12:49) E ere na Iesu iho ta ˈna mau haapiiraa, na te Metua râ.
UA PARAU Iesu e e Tamaiti o ˈna na te Atua, e ere o ˈna te Atua Manahope. Ahiri o Iesu te Atua, o vai ïa ta ˈna i pure a vai ai oia i te fenua nei? (Mataio 14:23; 26:26-29) Mea papu e aita Iesu i faahua paraparau i te tahi atu taata!
I to e piti pǐpǐ a Iesu aniraa ia ˈna i te tahi tiaraa taa ê i roto i to ˈna Basileia, teie ta ˈna i pahono atu: “Te parahi i tau rima atau e tau rima aui, eita ïa e tia ia ˈu ia horoa, maori râ no te feia i haapaohia e tau Metua no ratou ra.” (Mataio 20:23) Te haavare ra anei Iesu ia raua i to ˈna parauraa e aita to ˈna e tiaraa no te horoa ˈtu i ta raua e ani ra? Aita ïa! Ua ite haehaa râ oia e to te Atua anaˈe te mana no te rave i taua mau faaotiraa ra. Ua faataa atoa Iesu e te vai ra te tahi mau mea aita o ˈna e aita atoa te mau melahi i ite maori râ to ˈna Metua anaˈe.—Mareko 13:32.
Tei raro aˈe mai Iesu i te Atua i to ˈna noa vairaa mai ei taata i nia i te fenua nei? Aita. I muri aˈe atoa i to ˈna poheraa e tia-faahou-raa, te faataa ra te Bibilia ia Iesu ei raro aˈe mai i te Atua. Te haamanaˈo maira te aposetolo Paulo e “to te Mesia ra upoo, o te Atua ïa.” (Korinetia 1, 11:3) I a muri aˈe, ia au i te Bibilia, “ia tuu-mau-hia te mau mea atoa i raro aˈe ia ˈna ra, e i raro atoa aˈe ïa te Tamaiti iho ia ˈna, i tei tuu i te mau mea atoa i raro aˈe ia ˈna ra, ia riro o te Atua i nia iho i te mau mea atoa i te mau vahi atoa ra.”—Korinetia 1, 15:28.
Mea maramarama, e ere Iesu i te Atua Manahope. No reira oia i parau ai i to ˈna Metua ei “tau Atua.”—Apokalupo 3:2, 12; Korinetia 2, 1:3, 4.a
[Nota i raro i te api]
a Ei haamaramaramaraa hau, a hiˈo i te mau api 201-4 o te buka Eaha ta te Bibilia e haapii mau ra? neneihia e te mau Ite no Iehova.
[Parau iti faaôhia i te api 7]
Ua parau Iesu e te vai ra te tahi mau mea aita o ˈna e aita atoa te mau melahi i ite maori râ to ˈna Metua anaˈe