Noa e te diluvi—e mea mau, e ere i te aai

TE HIAAI ra anei outou i te hoê ao maitai aˈe—te hoê ao i reira te taata e ora ai ma te hau, te hoê ao aore e tamaˈi, aore e ohipa ino, aore e haavîraa? Mai te peu e e, e nehenehe outou e faaitoitohia e te hoê faatiaraa o ta outou paha i ite maitai. O te aamu ïa o Noa, te hoê taata maitai roa tei hamani i te hoê araka i ora ˈi oia e to ˈna utuafare i te hoê diluvi rahi tei haamou i te feia iino.

Mea varavara te mau aamu tei parare mai teie. Te faatiahia ra te ohipa i tupu i nia ia Noa i roto i te buka bibilia o te Genese, pene 6 e tae atu i te 9, e te faatia-atoa-hia ra te reira i roto i te Coran e te mau aai o te taata e rave rahi ati aˈe te fenua. Ua tupu mau anei te diluvi, aore ra e aai taipe noa anei te reira no te faaitoito i te taata ia rave i te mea tia? Ua aimârô na te feia maimi i te pae faaroo e te mau aivanaa no nia i teie uiraa e tau senekele i te maoro. Tera râ, te haapapu maitai ra te Bibilia, te Parau a te Atua—e faatiaraa mau teie, e ere i te aai. Teie te tahi mau tumu:

Te faaite ra te faatiaraa o te Genese i te matahiti, te avaˈe, e te mahana mau i haamata ˈi te diluvi, inafea e ihea te araka i te iriraa, e inafea te fenua i te mǎrôraa. E mea papu atoa te mau tuhaa rii no nia i te araka—to ˈna hohoˈa, to ˈna rahi, e te mau tauihaa no te hamaniraa i te reira. Ma te taa ê râ, e pinepine e mea papu ore roa te mau faataaraa o te mau aai.

Te haapapu ra na ihotatau e piti o te Bibilia e e taata mau o Noa. (Paraleipomeno 1, 1:4; Luka 3:36) E taata maimi haapao maitai o Ezera raua o Luka, tei papai i teie na ihotatau. Ua tuatapapa o Luka i to Iesu Mesia hui tupuna e tae roa ˈtu ia Noa.

Ua faahiti na peropheta Isaia e Ezekiela e na aposetolo Kerisetiano Paulo e Petero i te parau no Noa aore ra no te diluvi.—Isaia 54:9; Ezekiela 14:14, 20; Hebera 11:7; Petero 1, 3:19, 20; Petero 2, 2:5.

Ua faahiti Iesu Mesia i te diluvi i te na ôraa e: “Mai tei te anotau ia Noa ra, oia atoa ia tae i te anotau o te Tamaiti a te taata nei. Te amu ra hoi ratou, e te inu ra; te faaipoipo ra ratou, e te horoahia ra ratou e faaipoipo, e tae roa aˈera i te mahana i tomo ai Noa i roto i te pahi [aore ra araka] ra, o te diluvi maira, hope roa aˈera ratou i te pohe.” (Luka 17:26, 27) Ahiri e aita te diluvi i tupu, e mea faufaa ore ïa te parau a Iesu no nia i “te anotau o te Tamaiti a te taata nei.”

Ua tohu te aposetolo Petero e e tae mai te “feia tâhitohito” o te haafaufaa ore i ta te Bibilia e parau ra. ‘Te tia ra ia ratou,’ ta Petero ïa i papai, “te haamoe i teie, . . . i pohe ai te reira fenua [o te tau o Noa] i te ninaraahia e te miti.” E haamoe anei tatou i te reira? Eita roa ˈtu! Te na ô faahou ra Petero e: “Te raˈi e te fenua e vai nei, te tapeahia nei ïa . . . no te auahi ia tae i te mahana haavaraa, i te poheraa o te feia paieti ore ra.”—Petero 2, 3:3-7.

E haamou â te Atua i te feia iino, e e taata â te ora mai. Ma te pee i te hiˈoraa o Noa, peneiaˈe tei roto tatou i te feia parau-tia te ora ˈtu i roto i te hoê ao maitai aˈe.