666—e ere noa i te piri

“Eiaha roa te hoê taata ia hoo atu i te taoˈa, e ia hoo mai hoi, maori râ o te taata tei ia ˈna taua tapao ra, e te iˈoa o te puaa [taehae] ra, e te [numera] o taua iˈoa no ˈna ra. Tei ǒ nei te paari. E ite to ˈna ra, a taio oia i te [numera o te puaa taehae] nei: tei te taata hoi te auraa i teie nei [numera]: teie hoi te [numera] ia ˈna, e ono hanere, e ono ahuru, e ono.”—Apokalupo 13:17, 18; MN.

MEA iti te parau bibilia o tei faaara i te anaanatae e te tapitapi rahi mai te parau tohu o te tapao, aore ra iˈoa, miterio o “te puaa taehae”—te numera 666. I roto i te afata teata e i nia i te Internet, tae noa ˈtu i roto i te mau hohoˈa teata, buka, e vea, o te tapao o te puaa te tumu parau o te hamaniraa manaˈo hopea ore.

No vetahi, e tapao te 666 o te anetimesia bibilia. No vetahi ê, e huru ihotaata faahepohia ïa, mai te hoê nanaˈo aore ra te hoê puce eretoroni i tuuhia i raro aˈe i te iri ma te hoê numera o te tapao i te taata ei tavini na te puaa. Te tiaturi atoa ra te tahi atu e e tapao te 666 o te tiaraa pâpa Katolika, ma te mono i te mau numera Roma ei leta i roto i te iˈoa toroa o te pâpa, Vicarius Filii Dei (Orometua a te Tamaiti a te Atua), e ma te taui rii i te mau numera. Te parau-atoa-hia ra e e nehenehe taua noa numera ra e noaa mai maoti te iˈoa Latino o te Emepera Roma Dioclétien e te huriraa Hebera o te iˈoa Kaisara Néron.a

Mea taa ê roa râ teie mau tatararaa feruri-noa-hia e te hamanihia, i ta te Bibilia iho e parau ra no nia i te tapao o te puaa, mai ta tatou e ite i roto i te tumu parau i muri nei. Te faaite ra te Bibilia e e faaruru te feia tei ia ratou ra taua tapao ra, i te riri o te Atua ia haamou oia i teie nei faanahoraa o te mau mea. (Apokalupo 14:9-11; 19:20) No reira, te taaraa i te auraa o te 666, e ere noa ïa i te tatararaa i te hoê piri maere. Auaa e aita te Atua ra o Iehova, te hiˈoraa hau ê o te here e te Tumu o te maramarama pae varua, i vaiiho i ta ˈna mau tavini i roto i te ite ore i teie tumu parau faufaa.—Timoteo 2, 3:16; Ioane 1, 1:5; 4:8.

[Nota i raro i te api]