Tamahanahanaraa i te tau fifi

E ERE roa ˈtu te mau parau apî i teie mahana i te mea tamahanahana. Teie ta hoê taata i papai: “Mea peapea roa te mau ohipa e tupu nei, e pinepine, aita tatou i ite e e maraa anei ia tatou aore ra eita ia mataitai i te mau parau apî o te hora ono.” I roto i te ao, ua rahi roa te tamaˈi, te ohipa riaria, te mauiui, te ohipa ino, e te maˈi—e fatata paha tatou i te farerei roa ˈtu i teie mau ohipa iino mai te peu e aitâ i tupu.

Ua tohu te Bibilia ma te tia i teie huru tupuraa. I to ˈna faataaraa i to tatou tau, ua parau Iesu e e tupu te tamaˈi rahi, te maˈi rahi, te oˈe, e te aueueraa fenua. (Luka 21:10, 11) Oia atoa, ua papai te aposetolo Paulo no nia i “te mau taime ati rahi faaruru atâ,” i reira te taata e riro ai ei mea iria, te nounou moni, e te au ore i te taata maitai. Ua parau oia i taua tau ra te “anotau hopea.”—Timoteo 2, 3:1-5; MN.

No reira, i roto i te faataaraa i te mau huru tupuraa i te ao nei, ua tuea noa te mau parau apî e ta te Bibilia i tohu. Tera noa râ te tuearaa. Te horoa ra te Bibilia i te hoê manaˈo aita te mau parau apî e horoa ra. Na roto i te Parau faauruahia a te Atua, e taa ia tatou eiaha noa no te aha i rahi roa ˈi te ino, eaha atoa râ te oraraa no a muri aˈe.

To te Atua manaˈo i te ino

Te faataa ra te Bibilia eaha to te Atua manaˈo i te mau huru tupuraa peapea i to tatou tau. Noa ˈtu e ua faaite atea oia i te mau fifi nei, aita oia e farii ra i te reira e aita atoa e opua ra e faatia noa ˈtu. “E aroha hoi te Atua,” o ta te aposetolo Ioane ïa i papai. (Ioane 1, 4:8) Te haapao roa ra Iehova i te taata e mea riri na ˈna te ino atoa. Mea tano roa ïa ia fariu tatou i nia i te Atua no te ite i te tamahanahanaraa, i te mea e mea maitai oia e te aumihi e e mana to ˈna no te faaore i te ino i nia i te fenua e e hinaaro oia e rave i te reira. Ua papai te fatu salamo e: “O tei veve ra e ua tiaoro maira, na [te Arii i te raˈi ta te Atua i faatoroa] ïa e faaora; e tei ati ra e aita o ˈna e tauturu. E faaherehere oia i tei paruparu ra e tei veve, e faaora hoi oia i te feia taoˈa ore ra. E faaora oia ia ratou i te haavare e te rave ino ra, e to ratou toto e riro ei mea taoˈa na ˈna.”—Salamo 72:12-14.

Te aroha ra anei outou i te feia e mauiui ra? Oia paha. E huru maitai te aumauiui ta Iehova i tuu i roto ia tatou, no te mea ua hamani oia ia tatou ma to ˈna huru. (Genese 1:26, 27) E nehenehe ïa tatou e tiaturi e aita Iehova e tâuˈa ore ra i te mauiui o te taata. Ua haapii mai Iesu, o tei ite maitai aˈe ia Iehova i te tahi atu taata, e mea au roa na Iehova ia tatou e e Atua aumihi î i te here oia.—Mataio 10:29, 31.

Te haapapu ra te mau mea i poietehia e te haapao ra te Atua i te huitaata. Ua parau Iesu e ‘te faahiti nei te Atua i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.’ (Mataio 5:45) I te feia no te oire o Lusetera, ua parau te aposetolo Paulo e: “Aita râ [te Atua] i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa.”—Ohipa 14:17.

O vai te tumu o te ino?

A tapao na e ua parau atoa Paulo i te feia no Lusetera e: ‘Ua vaiiho noa te Atua i te mau fenua atoa i mutaa iho, ia haapao noa na ratou i ta ratou iho parau.’ No reira, o te mau fenua—aore ra te taata—te tumu rahi o te rahiraa o te mau huru tupuraa fifi ta ratou e faaruru ra. E ere na te Atua te hape.—Ohipa 14:16.

No te aha ïa Iehova e faatia ˈi ia tupu te mau ohipa iino? Eita anei oia e rave i te tahi mea no te arai i te reira? I roto noa i te Parau a te Atua e itehia ˈi te pahonoraa o teie na uiraa. No te mea ua taai-roa-hia te pahonoraa i te tahi atu mea ora varua e i te hoê tumu parau ta ˈna i mârô i roto i te ao varua.

[Hohoˈa i te api 4]

E aumauiui to te taata. Mea tâuˈa ore aˈe anei na te Atua te mauiui o te taata?

[Faaiteraa i te fatu o te hohoˈa i te api 2]

Api matamua: Pereoo pâ auri: UN PHOTO 158181/J. Isaac; aueueraa fenua: San Hong R-C Picture Company

[Faaiteraa i te fatu o te hohoˈa i te api 3]

Tamarii e pohe poia ra: UN PHOTO 146150 BY O. MONSEN