Aamu
Te tamauraa i nia i te eˈa o Iehova, o te haapuai ïa e te faaoaoa ia mâua
FAATIAHIA E LUIGGI D. VALENTINO
“Teie te eˈa: e na reira i te haere,” o ta Iehova ïa e aˈo ra. (Isaia 30:21) O ta ˈu ïa fa te peeraa i teie aˈoraa mai te taime mai iho â i bapetizohia ˈi au a 60 matahiti aˈenei. Ua haamau-oioi-hia teie fa maoti te hiˈoraa o to ˈu na metua, no Italia mai raua te haereraa mai e faaea i Cleveland, i Ohio, U.S.A., i te matahiti 1921. I reira to raua aratairaa e toru tamarii—to ˈu tuaana o Mike, to ˈu tuahine apî aˈe o Lydia, e o vau.
UA HIˈOPOA to ˈu na metua i te mau haapaoraa e rave rau, i te pae hopea râ, ua faaea raua no te mauruuru ore. E i te hoê mahana i te matahiti 1932, te faaroo ra Papa i te hoê porotarama radio reo Italia. E haapurororaa na te mau Ite no Iehova, e ua au roa Papa i te mea ta ˈna i faaroo. Ua papai oia no te ani i te haamaramaramaraa hau, e na te hoê Ite Italia no te pu a te mau Ite no Iehova i Brooklyn, i New York, i haere mai e farerei ia matou. I muri aˈe i te hoê aparauraa oraora maitai ua ao i te faaotiraa, ua papu i to ˈu na metua e ua itea mai ia raua te haapaoraa mau.
Ua haamata aˈera Papa e Mama i te haere i te mau putuputuraa e ua farii manihini i te mau tiaau ratere i te fare. Noa ˈtu e e tamaiti iti noâ vau, ua rave teie mau taata ia ˈu na muri ia ratou i roto i te ohipa pororaa e ua haamata i te haaferuri ia ˈu i te taviniraa ia Iehova ma te taime taatoa. Hoê o taua mau ratere ra, o Carey W. Barber ïa, e melo oia i teie nei o te Tino Aratai a te mau Ite no Iehova. Aita i maoro, i te avaˈe Fepuare 1941, ua bapetizohia vau i te 14raa o to ˈu matahiti, e i te matahiti 1944, ua haamata vau i te tavini ei pionie i Cleveland. Ua haamata atoa o Mike e o Lydia i te pee i te eˈa o te parau mau bibilia. Ua tavini o Mike ia Iehova e tae roa i to ˈna poheraa, e ua apee o Lydia i ta ˈna tane o Harold Weidner, e 28 matahiti i te maoro i roto i te taviniraa a te tiaau ratere. I teie mahana, te tavini nei raua ei tavini taime taatoa taa ê.
Ua haapaari atu â te fare tapearaa i ta ˈu faaotiraa e tamau noa
I te omuaraa o te matahiti 1945, ua mau vau i te fare tapearaa Chillicothe a te hau o Ohio no te mea ua turai to ˈu manaˈo haava i haapiihia ia au i te Bibilia ia haa vau ia au i te Isaia 2:4 e na ô ra e ia tiapaihia te ˈoˈe ei auri arote. I te hoê taime, ua faatia te feia toroa o te fare tapearaa ia fanaˈo te mau Ite i tapeahia i te tahi noa maa papai bibilia neneihia e te mau Ite no Iehova. Ua tauturu mai râ te tahi mau Ite no te hoê amuiraa piri. I te tahi mau taime, e taora ratou i te tahi maa papai i roto i te mau aua i pihai i te fare tapearaa. Ia poipoi aˈe, ia arataihia te feia i tapeahia i ta ratou mau vahi raveraa ohipa, e paimi ratou i taua mau papai ra a imi atu ai i te ravea no te hopoi mai i roto i te fare tapearaa. I te taime i tae atu ai au i te fare tapearaa, ua faatiahia matou ia fanaˈo i te papai hau. Noa ˈtu râ, ua haapii mau vau i te haafaufaa i te maa varua ta Iehova e horoa—te hoê haapiiraa ta ˈu e haamanaˈo noâ i te taime atoa e tae mai ai ta ˈu hoê numera apî o Te Pare Tiairaa aore ra o te A ara mai na!
Ia maoro rii, ua faatiahia matou e faatere i te mau putuputuraa a te amuiraa i roto i te fare tapearaa, aita râ te feia e ere i te Ite i faatiahia ia haere mai. Ua haere omoe mai râ te tahi feia toroa o te fare tapearaa e te tahi hoa fare tapearaa e ua farii te tahi pae i te parau mau. (Ohipa 16:30-34) Ua riro te mau tere o Taeae A. H. Macmillan ei haamahanahanaraa faahiahia mau. Ua haapapu noa oia ia matou e eita e mâuˈa te taime i faaea noa ˈi matou i roto i te fare tapearaa no te mea ua faaineine te reira ia matou no te tahi mau hopoia no a muri aˈe. Ua putapû to ˈu mafatu i taua taeae paari here ra e ua haapaari atu â oia i ta ˈu faaotiraa e haere na te eˈa o Iehova.
Ua noaa ia ˈu te hoê hoa
Ua hope te Piti o te Tamaˈi Rahi, ua mahiti te mau uputa o te fare tapearaa, e ua haamata apî au i te ohipa pionie, te taviniraa taime taatoa. I te matahiti 1947 râ, ua pohe to ˈu papa. No te tauturu i te utuafare, ua rave au i te ohipa e ua aravihi-atoa-hia vau i te ohipa taurumi—te hoê itehaa tei tauturu mai ia ˈu i te hoê tau fifi ta mâua ta ˈu vahine i farerei fatata e 30 matahiti i muri aˈe. Te taa ê roa nei râ ta ˈu faatiaraa. Na mua, e faatia ˈtu vau no nia i ta ˈu vahine.
I te hoê avatea i te matahiti 1949, tei roto vau i te Piha a te Basileia a taˈi mai ai te niuniu. Ua rave atu vau e ua faaroo ihora i te hoê reo au mau e na ô ra e: “O Christine Genchur to ˈu iˈoa. E Ite no Iehova vau. Ua haere mai au i Cleveland e imi i te ohipa, e te hinaaro nei au e amui atu i roto i te hoê amuiraa.” Mea atea ta matou Piha a te Basileia i te vahi ta ˈna e faaea ra, ua au râ vau i te taˈi o to ˈna reo, no reira vau i faataa ˈtu ai nafea ia haere mai i ta matou piha e i faaitoito atu ai e haere mai i taua Tapati ra—te mahana na ˈu te oreroraa parau no te taatoaraa. I te Tapati, o vau te taata matamua i roto i te Piha a te Basileia, aita râ e tuahine matau-ore-hia i faura mai. I te roaraa o te oreroraa parau, ua tamau vau i te hiˈo atu i te uputa, aita râ e taata i tomo mai. Ia poipoi aˈe, ua taniuniu vau ia ˈna, e ua parau mai oia e aitâ oia i matau maitai atura i te faanahoraa pereoo utaraa taata. Ua pûpû atura vau e farerei ia ˈna no te faataa maitai aˈe i te mau mea.
Ua itea mai ia ˈu e ua haamata to ˈna na metua, no Tekolovakia mai hoi i te haereraa mai, i te amui e te Feia haapii Bibilia i muri aˈe i te taioraa i te buka iti ra Où sont les morts? Ua bapetizohia to ˈna na metua i te matahiti 1935. I te matahiti 1938, ua riro te papa o Christine ei tavini o te pǔpǔ (parauhia i teie nei tiaau peretiteni) o te amuiraa Ite no Iehova i Clymer, i Pennsylvanie, U.S.A., e i te matahiti 1947, ua bapetizohia Christine i te 16raa o to ˈna matahiti. Aita i maoro te tupuraa mai to ˈu here i teie tuahine haviti e te haapao i ta te varua. Ua faaipoipo mâua i te 24 no Tiunu 1950, e mai reira mai ua riro noa Christine ei hoa apiti haapao maitai no ˈu, tei tuu noa i te mau faufaa a te Basileia i mua ma te aau tae. Te mauruuru nei au ia Iehova e ua farii teie hoa aravihi e apiti mai i to ˈna oraraa i to ˈu.—Maseli 31:10.
Te hoê ohipa maere rahi
I te 1 no Novema 1951, ua haamata mâua i te tavini amui ei pionie. E piti matahiti i muri aˈe, i te hoê tairururaa i Toledo, i Ohio, ua paraparau Taeae Hugo Riemer e Taeae Albert Schroeder i te hoê pǔpǔ pionie e anaanatae ra i te taviniraa mitionare. Tei roto mâua ia ratou. Ua faaitoitohia mâua e tamau i te tavini ei pionie i Cleveland, i te avaˈe râ i muri noa mai, ua tae mai ta mâua ohipa maere rahi—te hoê titauraa e haere i te 23raa o te piha a te Haapiiraa Bibilia no Gileada a te Watchtower o te haamata i te avaˈe Fepuare 1954!
A tere noa ˈtu ai mâua na nia i te pereoo i te Haapiiraa no Gileada, i South Lansing, i New York ïa i taua tau ra, no to Christine taiâ, ua tamau oia i te parau mai e, “A tere mǎrû â!” Ua na ô vau e, “Christine, ia tere mǎrû â tâua, e tapea roa ïa tâua.” I to mâua râ tapaeraa ˈtu i te fare haapiiraa, aita i maoro te toparaa to mâua hau. Ua manava Taeae Nathan Knorr i te pǔpǔ feia haapii e ua haamataitai mai nei ia matou i taua mau vahi ra. Ua faataa atoa mai oia nafea matou e nehenehe ai e tarani i te pape e te uira, a onoono ai e e maitai morare te feruriraa tarani ia haapaohia te mau faufaa a te Basileia. Ua puta taua aˈoraa ra i roto i to mâua feruriraa. Te ora nei â mâua ia au i te reira.
Te tereraa ˈtu i Rio na nia i te manureva
Aita i maoro, ua faatuitehia matou, e i te 10 no Titema 1954, ua paiuma mâua i nia i te hoê manureva i te oire toetoe o New York, ma te hitahita te aau i te tereraa ˈtu i ta mâua tuhaa taviniraa apî i te oire mahana maitai ra o Rio de Janeiro, i Beresilia. Hoê â to mâua tereraa e o Peter raua Billie Carrbello, nau hoa mitionare. E 24 hora tei manaˈohia no te tere, ma te tapea i Porto Rico, Venezuela, e Belém i Beresilia Apatoerau. No te tahi râ mau fifi o te matini, e 36 hora tei mairi hou mâua a ite atu ai ia Rio de Janeiro i raro mai ia mâua. Auê râ ïa mataitairaa nehenehe e! Te anaana ra te mau mori o te oire mai te mau taiamani ura i nia i te hoê tapoˈi tahua ereere, e te anapanapa ra te maramarama e au i te ario o te avaˈe i nia i te pape o te ooa Guanabara.
Te tiai maira tau melo o te utuafare o te Betela ia matou i te tauraa manureva. I muri aˈe i te manavaraa mai ia matou ma te mahanahana, ua faahoro ratou ia matou i te amaa ra, e fatata i te hora toru i te aahiata, ua haere matou e taoto. Tau hora i muri aˈe, ua haamanaˈo mai te ôe faaararaa ia matou e ua haamata ta matou mahana matamua ei mitionare!
Te hoê haapiiraa oioi
Ua oioi mâua i te haapiiraa i te hoê mea faufaa. Ua haere mâua i te hoê ahiahi i te fare o te hoê utuafare Ite. I to mâua hinaaroraa e hoˈi i te Betela na raro, ua na ô mai te fatu fare e, “Eiaha, eita ta orua e nehenehe e haere; te ûa ra,” e ua tamata oia i te tapea mai ia mâua i taua po ra. “E ûa atoa i te vahi no reira mai mâua,” o ta ˈu ïa i parau, a tâuˈa ore ai i ta ˈna mau parau ma te ata. E ua haere atura mâua.
No te mau mouˈa e haaati ra ia Rio, e pue oioi te pape ûa e e tahe mai i raro i te oire, a faatupu pinepine ai i te vai pue. Aita i maoro, te haere ra mâua na roto i te pape tei tae roa i to mâua turi ra. I pihai iho i te Betela, ua riro te mau purumu ei anavai puai tei tae roa i to mâua êê. Ua rari roa mâua i to mâua taeraa i te pae hopea i te Betela. Ia poipoi aˈe, aita o Christine e oaoa ra e ua pou mai oia ma te fiva typhoïde, tei haaparuparu ia ˈna no te hoê taime roa. Aita e faufaa ia parau e, ei mitionare, mea tia ia mâua ia haapao i te aˈoraa a te mau Ite paari no taua vahi ra.
Mau taahiraa avae matamua i roto i te ohipa mitionare e tiaau ratere
I muri aˈe i teie haamataraa au ore, ua rave mâua i ta mâua taviniraa ma te aau tae. Ua taio mâua i te hoê faaiteraa na roto i te reo Potiti i te taata atoa ta mâua i farerei, e e au ra ia mâua e ua fatata to mâua haereraa i mua i te aifaito. E parau mai te hoê fatu fare ia Christine e, “E taa ia ˈu oe, eita râ e taa ia ˈu o ˈna,” a toro ai i te rima i nia ia ˈu. E parau mai te tahi atu fatu fare ia ˈu e, “E taa ia ˈu oe eiaha o ˈna.” Noa ˈtu râ, ua oaoa mâua i te noaaraa hau atu i te 100 tamatahitiraa i Te Pare Tiairaa i taua nau hebedoma matamua ra. Inaha, ua bapetizohia te tahi nau feia haapii Bibilia ta mâua i to mâua matahiti matamua i Beresilia, o tei faaite aˈena mai e e riro teie tuhaa taviniraa mitionare ei mea hotu maitai.
I ropu i te mau matahiti 1950, aita te mau amuiraa e rave rahi i Beresilia e fanaˈo ra i te mau tere tamau o te mau tiaau haaati no te iti o te mau taeae aravihi. No reira e noa ˈtu e te haapii noa râ vau i te reo e aitâ vau i vauvau atura i te hoê oreroraa parau no te taatoaraa na roto i te reo Potiti, ua tonohia vau i roto i te ohipa haaati i te hau o São Paulo i te matahiti 1956.
I te mea e aita te amuiraa matamua ta mâua i farerei i farii i te hoê tiaau haaati a piti atura matahiti, te tiai rahi ra te taata atoa i te oreroraa parau no te taatoaraa. No te faaineine i te oreroraa parau, ua paoti au i te mau paratarafa i roto i te mau tumu parau o Te Pare Tiairaa na roto i te reo Potiti e ua tapiri i te mau tâpû parau i nia i te mau api parau. I taua Tapati ra, ua tomo roa te Piha a te Basileia. Te parahi atoa ra te tahi mau taata i nia i te tahua, e te tiai ra te taatoaraa i te tupuraa rahi. Ua haamata aˈera te oreroraa parau, aore ra eiaha, te taioraa. I te tahi mau taime, ua hiˈo vau i te taata e ua maere roa vau e aita hoê e hautiuti ra, tae noa ˈtu te tamarii. Te araara maitai ra to ratou paatoa mata i nia ia ˈu. Ua manaˈo vau e: ‘Hei, Valentino, ua ite roa oe i te reo Potiti! Te faaroo maitai ra teie mau taata.’ Tau matahiti i muri aˈe, i to ˈu hoˈi-faahou-raa i roto i taua amuiraa ra, ua parau mai te hoê taeae i tae mai i taua tere matamua ra e: “Te haamanaˈo ra anei oe i taua oreroraa parau no te taatoaraa ta oe i vauvau? Aita i taa ia matou hoê noa ˈˈe parau.” Ua faˈi au e aita atoa i taa ia ˈu te rahiraa o taua oreroraa parau ra.
I taua matahiti matamua i roto i te ohipa haaati ra, ua taio pinepine au i te Zekaria 4:6. Ua haamanaˈo mai te mau parau ra, ‘Eiaha i te mana, na ta ˈu varua râ,’ e o te varua o Iehova te tumu hoê roa i haere ai te ohipa a te Basileia i mua. E ua haere mau â i mua noa ˈtu te mau taotiaraa i ite-maitai-hia.
Mau fifi e mau haamaitairaa i nia i te eˈa
E titau te ohipa haaati e tere na te fenua a taˈitaˈi ai i te hoê matini patapata parau, te hoê afata papai, te mau pute vairaa ahu e te mau pute vairaa buka. E haapao maitai o Christine e numera i ta mâua mau tauihaa eiaha ia haamoehia hoê ia taui mâua i te pereoo utaraa taata. E ere i te mea varavara ia tere na nia i te pereoo utaraa taata 15 hora i te maoro i nia i te mau purumu î i te repo huˈahuˈa hou a tapae atu ai i ta mâua fa i muri mai. I te tahi taime, mea riaria atoa ia farerei iho â râ e piti pereoo utaraa taata e haere ra i na pae huri tua i nia i te eˈaturu taueue i te hoê â taime, o te piri roa te tahi i te tahi e au ra paˈi e e fatata roa i te û. Ua tere atoa mâua na nia i te pereoo auahi, te pahi, e te puaahorofenua.
I te matahiti 1961, ua haamata mâua i te tavini i roto i te ohipa mataeinaa, a tere ai mai tera tuhaa haaati e i te tahi atu eiaha râ mai tera amuiraa e i te tahi atu. Tau ahiahi i te hebedoma, ua pata mâua i te mau hohoˈa tavirihia e te faanahonahoraa a Iehova—i te hoê vahi i te hoê haereraa. E pinepine i te titauhia ia haavitiviti mâua no te haamaau i te pǔpǔ ekalesiatiko no taua mau vahi ra tei tamata i te tapea i taua mau pataraa ra. I roto i te hoê oire, ua haamǎtaˈu te perepitero i te fatu o te hoê piha rururaa ia faaore oia i te parau faaau ta ˈna i rave e o mâua. I muri aˈe tau mahana imiraa, ua itea mai ia mâua te tahi atu vahi, aita râ mâua i faaite i te hoê noa ˈˈe taata e ua tamau mâua i te titau i te taata atoa i te vahi matamua. Hou te porotarama a haamata ˈi, ua haere Christine i taua piha ra e ua tono i te feia e hinaaro ra e mataitai i te hohoˈa i te vahi apî ra ma te mǎrû. I taua ahiahi ra, 150 taata tei ite i te hohoˈa, ua tano roa hoi te upoo parau ra La Société du Monde Nouveau en action.
Noa ˈtu e i te tahi mau taime, mea fifi te ohipa ratere i te mau vahi moemoe, no te mauruuru o te mau taeae haehaa e ora ra i reira i to mâua mau tere e no to ratou farii-maitai-raa mai ia mâua i roto i to ratou mau fare faatate ore, ua haamaitai noa mâua ia Iehova e ua tae mâua ia ratou ra. Ua horoa mai te faahoaraa ia ratou i te mau haamaitairaa tamahanahana na mâua. (Maseli 19:17; Hagai 2:7) No reira, ua peapea mau â mâua e ua hope to mâua tau mitionare i muri aˈe i to mâua taviniraa hau atu i te 21 matahiti i Beresilia!
I te hoê taime fifi, ua faaite mai Iehova ia nafea mâua
I te matahiti 1975, ua tâpûhia o Christine. Ua hoˈi faahou mâua i roto i te ohipa ratere, ua ino atu â râ hoi te huru o Christine. E au ra e mea maitai aˈe e hoˈi i te mau Hau Amui ia rapaauhia oia. I te avaˈe Eperera 1976, ua tae mâua i Long Beach, i Kalifonia, e ua faaea mâua i ǒ to ˈu mama ra. No to mâua faaearaa e piti ahuru matahiti i te fenua ê, aita mâua e taa faahou ra nafea ia faaruru i teie huru tupuraa. Ua haamata vau i te rave i te mau taurumiraa, e ua turu te moni i noaa mai maoti taua ohipa ra ia mâua. Ua faaô te hau o Kalifonia ia Christine i roto i te hoê fare maˈi, ua paruparu noa ˈtu â râ oia i te mau mahana atoa no te mea aita te mau taote i hinaaro e rapaau ia ˈna ma te toto ore. No to mâua hepohepo, ua maimi mâua i te aratairaa a Iehova.
I te hoê avatea, tei roto vau i te taviniraa a ite atu ai au i te piha toroa a te hoê taote e ua faaoti taue atura vau e tomo i roto. Noa ˈtu e te faaineine ra te taote e hoˈi i te fare, ua farii mai oia ia ˈu i roto i ta ˈna piha ohipa, e ua paraparau mâua e piti hora i te maoro. Ua parau maira oia e: “Mea mauruuru na ˈu ta orua ohipa ei mitionare, e e rapaau vau i ta oe vahine ma te moni ore e ma te toto ore.” Ua maere roa vau i te faarooraa ˈtu i te reira.
Ua faahaere teie taote maitai, e taote taa ê faaturahia hoi oia, ia Christine i roto i te hoê fare maˈi i reira oia i rave ai i te ohipa, e maoti ta ˈna rapaauraa ma te ite, ua maitai oioi mai oia. Ua mauruuru roa mâua e ua faaite mai Iehova i te ravea i taua taime fifi ra!
Tuhaa taviniraa apî
No te mea ua itoito-faahou-hia mai o Christine, ua tavini mâua ei pionie e ua oaoa i te tautururaa tau taata i Long Beach ia riro ei feia haamori ia Iehova. I te matahiti 1982, ua anihia mai ia mâua e rave i te ohipa haaati i te mau Hau Amui. Ua haamauruuru mâua ia Iehova i te mau mahana atoa no to ˈna faaohipa-faahou-raa ia mâua i roto i te ohipa haaati—te hoê huru taviniraa ta mâua i au. Ua tavini mâua i Kalifonia e i muri iho i Nouvelle-Angleterre, te vai ra te tahi mau amuiraa reo Potiti i roto i te tuhaa haaati i reira. I muri aˈe, to roto atoa te mau Bermudes i te reira.
E maha matahiti haumârû i muri aˈe, ua horoahia mai te tahi atu tuhaa taviniraa na mâua. Ua titauhia mâua e tavini ei pionie taa ê i te vahi ta mâua i hinaaro. Noa ˈtu e ua peapea mâua i te vaiihoraa i te ohipa ratere, ua faaoti maite mâua e tamau i roto i ta mâua tuhaa taviniraa apî. Ihea râ? I roto i te ohipa ratere, ua tapao vau e te hinaaro ra te amuiraa reo Potiti no New Bedford, i Massachusetts i te tauturu—ua reva ˈtura ïa mâua i New Bedford.
I to mâua tapaeraa ˈtu, ua faatupu te amuiraa i te hoê oroa manavaraa rahi no mâua. Ua manaˈo mau â mâua e mea au-roa-hia mâua! Ua tahe roa to mâua roimata no te putapû. Ua rave na hoa faaipoipo apî e to raua na tamarii e piti ia mâua ma te maitai i roto i to ratou fare e ia iteahia mai to mâua iho fare. Ua haamaitai mau Iehova i teie tuhaa taviniraa pionie taa ê ma te hau atu â i ta mâua i manaˈo. Mai te matahiti 1986 mai, ua tauturu mâua fatata e 40 taata taa ê i roto i teie oire ia riro ei Ite. O ratou to mâua fetii pae varua. Hau atu â, ua oaoa vau i te iteraa e pae taeae no teie vahi i te haereraa i mua no te riro mai ei tiai mamoe î i te here. Ua riro te reira mai te taviniraa i roto i te hoê tuhaa taviniraa mitionare hotu maitai.
Ia hiˈo mâua i muri, e oaoa mâua e ua tavini mâua ia Iehova mai te apîraa mai â e ua faariro i te parau mau ei huru oraraa no mâua. Parau mau, te ohipa ra te matahiti rahi e te mau paruparu i nia ia mâua i teie nei, teie râ, te haapuai e te faaoaoa noa nei â te tamauraa i nia i te eˈa o Iehova ia mâua.
[Hohoˈa i te api 26]
No tae noa ˈtura i Rio de Janeiro
[Hohoˈa i te api 28]
To mâua fetii pae varua—te amuiraa reo Potiti i New Bedford, i Massachusetts