Mau uiraa a te feia taio
Te vai ra te hoê parau tohu tuiroo no nia i te Mesia i roto i te Isaia pene 53. Te na ô ra te irava 10 (MN) e: “Ua au ia Iehova iho i te nenei ia ˈna; ua haaparuparu oia ia ˈna i te maˈi.” Eaha to te reira auraa?
Mea ohie ia ite no te aha te hoê uiraa e hiti mai ai no nia i te Isaia 53:10. Eita te mau Kerisetiano mau e manaˈo e e au i to tatou Atua aau aroha e te here i te nenei aore ra i te haaparuparu i te hoê noa ˈˈe taata i te maˈi. Te horoa maira te Bibilia i te niu no te tiaturi e eita te Atua e au i te haamauiui i te taata hapa ore. (Deuteronomi 32:4; Ieremia 7:30, 31) I te roaraa o te mau senekele, ua faatia Iehova i te mauiui i te tahi mau taime no te tahi tumu e au i to ˈna paari e to ˈna aroha. Papu maitai râ e aita oia i faatupu i te mauiui o ta ˈna Tamaiti here o Iesu. Eaha ïa te auraa mau o teie irava?
Inaha, e tauturuhia tatou ia taa eaha te auraa ia hiˈo tatou i te irava i roto i to ˈna taatoaraa, a tapao ai i na faaohiparaa e piti o te taˈo ra “au.” Te na ô ra te Isaia 53:10 [MN] e: “[Ua au ia Iehova iho i te nenei ia ˈna; ua haaparuparu oia ia ˈna i te maˈi.] Ia faarirohia ra oia ei taraehara, e ite oia i to ˈna huaai, e maoro hoi to ˈna pue mahana; e [tei au ia] Iehova, e tupu ïa i tana rima.”
Te faaite ra te poroi taatoa o te Bibilia e ua taaihia “tei au ia Iehova,” mai tei faahitihia i te hopea o te irava, i te faatupuraa i ta ˈna opuaraa na roto i te Basileia. Ia na reira Iehova, e faatia oia i to ˈna tiaraa arii e e rave oia e ia faaorehia te hara a te feia faaroo—ta tatou ïa mau hara. (Paraleipomeno 1, 29:11; Salamo 83:18; Ohipa 4:24; Hebera 2:14, 15; Ioane 1, 3:8) Te ravea rahi no te reira mau mea, ia riro mai ïa te Tamaiti a te Atua ei taata e ia horoa oia i te tusia taraehara. Mai ta tatou i ite, i te na reiraraa, ua mauiui o Iesu. Te faaite maira te Bibilia e “i ite oia i te auraro i to ˈna ra mau pohe.” Ua faufaahia ïa Iesu i teie mauiui.—Hebera 5:7-9.
Ua ite aˈena Iesu e e titau te oraraa maitai ta ˈna e ora i te tahi maa pohe. E taa-maitai-hia te reira ia au i te mau parau i papaihia i roto i te Ioane 12:23, 24: “Ua tae i te hora e haamaitaihia ˈi te Tamaiti a te taata nei. Amene, amene, e parau atu vau ia outou, Ia tuuhia te hoê huero sitona i raro i te repo ia ore râ ia pohe ra, ua vaiiho hoê noa ïa, ia pohe râ, rahi roa ˈtura ïa te hotu.” Oia, ua ite Iesu e e tia ia ˈna eiaha e taiva e tae noa ˈtu i te pohe. Te na ô faahou ra te faatiaraa e: “Ua horuhoru roa tau varua i teie nei, e e nahea vau? e na ô anei? E tau Metua, e faaora ia ˈu i teie nei hora; i haere mai ai râ vau no teie nei hora. E tau Metua, e haamaitai i to iˈoa. Ua itea maira te hoê reo no nia i te raˈi i te na ôraa mai, Ua haamaitai au, e e haamaitai faahou atu â vau.”—Ioane 12:27, 28; Mataio 26:38, 39.
I roto i te mau irava tapiri e taa ˈi ia tatou te Isaia 53:10. Ua ite maitai Iehova e i roto i te mau mea ta ta ˈna Tamaiti e farerei, te vai ra te neneiraa, hoê ïa auraa tera. Ma te manaˈo râ i te maitai hanahana e te rahi e noaa mai, ua au ia Iehova i ta Iesu e farerei mai. Na roto i taua auraa ra, ‘ua au ia Iehova i te nenei,’ i te Mesia aore ra ia neneihia oia. Ua au atoa ia Iesu i ta ˈna i nehenehe e rave e i rave mau. Oia mau, mai ta te Isaia 53:10 [MN] e faaoti ra, “[tei au ia] Iehova, e tupu ïa i tana rima.”