Hoê haapiiraa no roto mai i te ihitai
MEA rohirohi te fanoraa ma te apiti ore na tua. E nehenehe te huru paruparu o te rohirohi e aratai ohie i te ihitai i te tahi paeau o te hoê vahi atâta, e hapehia ïa e e ravehia te mau faaotiraa tano ore. No reira, e mauruuru oia i te faufaaraa o te hoê tutau. E tauturu te reira i te hoê ihitai rohirohi ia faafaaea e ia itoito faahou mai ma te ore e painu roa. I taua taime ra, e turai te tutau i te muaraa o te pahi ia faaû i te mataˈi e te mau are e ia mau papu roa te pahi.
Mai te mau horopahi o te faaruru i te mau fifi e rave rahi na te moana, e faaruru te mau Kerisetiano i te mau faaheporaa tamau a teie nei ao e e hinaaro ratou e faafaaea. Inaha, i te hoê taime, ua faaue Iesu i ta ˈna mau pǐpǐ e: “A haere mai outou anaˈe iho, tatou i te hoê vahi moemoe e faaea iti noa ˈˈe.” (Mareko 6:31) I teie mahana, e rave paha vetahi tau hebedoma no te reva haere aore ra i te hoê hopea hebedoma no te faafaaea e to ratou utuafare. E nehenehe teie mau taime e tamǎrû e e faahaumǎrû. Nafea râ e papu ai ia tatou e ua paruruhia tatou i te pae varua i taua mau taime ra? Eaha ta tatou tutau pae varua ia ore tatou e painu e ia mau papu tatou?
E ravea ta Iehova i rave maitai no tatou. Aita ˈtu maori râ ta ˈna Parau Moˈa, te Bibilia. Na roto i te taioraa i te reira i te mau mahana atoa, e nehenehe tatou e faaea i pihai iho ia Iehova e eiaha roa ˈtu e faarue ia ˈna. E nehenehe te mau aˈoraa i roto e haamau papu e e tauturu ia tatou ia faaruru i te mau tamataraa a Satani e ta ˈna ao. E nehenehe to tatou pee-tamau-raa i te hoê porotarama taioraa Bibilia e riro ei tutau pae varua no tatou, tae noa ˈtu i te taime ê atu i ta tatou porotarama matauhia.—Iosua 1:7, 8; Kolosa 2:7.
Te haamanaˈo ra te papai salamo ia tatou e “e [oaoa] to te taata” tei “hinaaro . . . i te ture a Iehova; e tei ta ˈna ture to ˈna manaˈoraa i te rui e te ao.” (Salamo 1:1, 2; MN) Maoti te taioraa i te Parau a te Atua i te mau mahana atoa, e noaa ïa ia tatou te “oaoa” o te tamǎrû e te faahaumǎrû mau, faaineinehia ia tamau tatou i ta tatou hororaa Kerisetiano.